Канд бынæттон лæппутæ æмæ чызджытæ йæм нæ цæуынц, фæлæ ма республикæйы иннæ районты æмæ суанг сыхаг Кæсæг-Балхъары минæвæрттæ дæр
Лескены дыууæ азæй фылдæр кусы спортивон акробатикæйы секци. Канд бынæттон лæппутæ æмæ чызджытæ йæм нæ цæуынц, фæлæ ма республикæйы иннæ районты æмæ суанг сыхаг Кæсæг-Балхъары минæвæрттæ дæр. Сæ тренировкæтæ сын федта не сфæлдыстадон къорд, æмæ бæлвырддæр хабæрттæ радзурдзæн Сосранты Жаннæ.
Цалдæр азы размæ дæр ма зын бауырнæн уыд дæрддзæф хъæуы кусдзæн ахæм спортивон секци. Ныридæгæн дзы архайы 60 сывæллоны. Сæ кармæ гæсгæ сты алыхуызон. Раздæр уал рогдæр фæлтæрæнтæ, уый фæстæ та зындæр хъуыддæгтыл архайдмæ бавналынц. Сæ арæхстдзинадыл кусынц дымсгæ гимнастикон мигæнæныл.
Æнæдызæрдыгæй къæхтыл æрлæууын, афтæ æнцон хъуыддаг нæу. Уый къухы фты, сывæллоны æвæллайгæ куысты фæрцы, уыимæ тренеры цæстдардæй. Спортивнон гимнастикæйы спорты мастер Цъебойты Рустамы ныхæстæм гæсгæ Лескены ацы секци байгом кæнын бантыст ныййарджыты фæрцы. Æмæ кæд ацы спорты хуыз хъуыстгонддæрты номхыгъдмæ хаст нæ цæуы, уæддæр адæммæ æвзæрын кæны цымыдисдзинад. Уыимæ куыд лæппутæм, афтæ чызджытæм дæр. Архайынц дзы æндæр хъæуты минæвæрттæ дæр.
Ацы къорды архайджытæм разæнгарддзинад гуырын кæны республикон ерысты архайын. Сæ арæхстдзинад уал равдыстой уым. Æцæгдзинадæн та ма зæгъын хъæуы уый дæр, æмæ сæм сæрмагонд архайæн дзаумæттæ кæй нæй, уымæ гæсгæ къорд спортивон гимнастикæйæ баивтой акробатикæмæ. Абоны бонмæ семæ цы кусæнгæрзтæ ис, уыдон самал кæнын та бантыст зæрдæхæлар адæмы æххуысы фæрцы.
Секцимæ истой кæйдæриддæр фæндыд, уыдоны. Сывæллæтты цæттæдзинад, æнæмæнг, у фæйнæхуызон. Кæйдæрты фæнды се нæниздзинадыл бакусын, иннæтæ та тырнынц бæрзонд бæрæггæнæнтæ равдисынмæ. Арæх ардæм æрбацæуынц æндæр къордты архайджытæ дæр. Фарастаздзыд Тагъаты Малика, зæгъæм, дзюдомæ цæуы æртæ азы. Ныр та ма йæ бафæндыд йæхи бафæрварын гимнастикæйæ. Уый размæ цы зонындзиндтæ райста, уыдон ын баххуыс кодтой тагъддæр ацы спорты хуызмæ рахизынæн.
Секцийы хъомылгæнинæгты ныхæстæм гæсгæ сæ сæ тренер къуылымпы кæнын нæ уадзы. Æмбарын сын кæны – цæмæй къухы стыр æнтыстдзинæдтæ бафта, уымæй архайын хъæуы æвæллайгæйæ.
Чи зоны æмæ рæхджы Лескены спортивон къорды архайджытæ ерыс кæныдзысты Ирыстоны, стæй Уæрæсейы æвзонг спортсментимæ. Тренировкæты цы арæхстдзинæдтæ фылдæр кæнынц, уыдоны фæрцы та сын бантысдзæн зæрдæмæдзæугæ бæрæггæнæнтæ равдисын.
