Республикæйы паддзахадон исбоны æмæ зæххы ахастдзинæдты министрад сси акциты 100% иунæг хицау
Цæгат Кавказы кинохроникæйы студи лæвæрд æрцыди республикæйы исбонмæ. Республикæйы паддзахадон исбоны æмæ зæххы ахастдзинæдты министрад сси акциты 100% иунæг хицау. Студийы куыстмæ йæ цæст дардзæн культурæйы министрад. Исбоны æмæ зæххы ахастдзинæдты министрады разамонæг Тедеты Руслан куыд загъта, афтæмæй ныртæккæ райдыдтой хæстæ фидын. Ныридæгæн бакуыстой 57 хъуыддагыл, æдæппæтæй 13 милуан сомы бæрцæн. Кæй зæгъын æй хъæуы, ис ма дзы бирæ бакусинаг хъуыддæгтæ. Фæзынди дзы ног хæстæ куысты мыздæй. Фæлæ уыдон равзарын хъæуы бæстонæй, уымæн æмæ студи бирæ азты нæ куыста. Ацы куыст кæндзысты дарддæр дæр. Кинохроникæйы генералон директоры хæстæ æххæстгæнæгæй нысангонд æрцыди Æлбегаты Артур. Уæ зæрдыл уын æй лæууын кæнæм, студи республикæйы исбонмæ радтыны бадзырд апрелы бафыста бæстæйы Президент Владимир Путин. Зæгъдзыстæм ма уый дæр, æмæ кинохроникæйы студийæн бындур æвæрд æрцыди 1946-æм азы. Уыцы рæстæгмæ рауагъта 500 документалон, ахуырадон æмæ наукон-популярон кинойы.
