Сты æнцонархайд æмæ хорз фадæттæ кæм ис, ахæмтæ
Цæгат Ирыстоны презентаци скодтой, Китайы кæй аразынц, ахæм автобустæн. Сты æнцонархайд æмæ хорз фадæттæ кæм ис, ахæмтæ. Транспорт у регионты хсæн маршруттæн, машинæтæ æххæст сты ГЛОНАСС-ы системæтæй, тахографтæй, видеоцæстдарды камерæтæй æмæ бæлццæтты æдасдзинадæн æндæр фæрæзтæй. Республикæйы Сæргълæууæг Сергей Меняйло æмæ иннæ бæрнон кусджытæ æркастысты æмæ аргъ скодтой, 55 бынаты кæм ис, ахæм бæлццæттæласæн автобустæн. Куыд фæбæрæг кодтой, афтæмæй Кæрæсейы Higer у æппæты парахатдæр чи у, ахæм автобусы хуыз. Автоколоннæ 1210-ы директор Хъараты Зауырбег куыд зæгъы, афтæмæй каст цæуы, цæмæй ацы транспортæй ивд æрцæуой, регионты хсæн маршруттыл чи куыста, æмæ чи базæронд, автопарчы уыцы машинæтæ. Кæд хъуыддаг сырæза, уæд автобустæ самал кæндзысты лизингмæ гæсгæ. Уый та сын фадат ратдзæн бæлццæтты нымæц фæфылдæр кæнынæн. 55 бынаты кæм ис, иу ахæм моделы аргъ у 11 милуанмæ хæстæг. Абон регионты хсæн республикæйы кусы 15 автобусы. Рейсытæ кæнынц Дзæуджыхъæуæй Ростовмæ, Краснодармæ, Волгоградмæ, Минводмæ æмæ æндæр рæттæм. Кæд ног Higer-тæ райсой, уæд ма маршруттыл бафтдзæн. Адæмы ласдзысты Ялтæмæ, Севастопольмæ, Ереванмæ æмæ Бакумæ. Сергей Меняйло хицауады сæрдары фыццаг хæдивæг Æгъуызарты Муратæн бахæс кодта, компанийы минæвæрттимæ бакусын, цæмæй республикæ автотранспорт райса лизингмæ гæсгæ.
