Абоны онг нæ республикæйы ис, 2021-æм азмæ бæлвырд æмгъуыдмæ цы арæзтæдтæ нæ фесты, ахæм бындурон цалцæджы 17 объекты
Цæгат Ирыстоны Сæргълæууæг Сергей Меняйлойы разамындæй арæзт æрцыд арæзтадон къабазы лыггæнинаг фарстаты фæдыл æмбырд. Абоны онг нæ республикæйы ис, 2021-æм азмæ бæлвырд æмгъуыдмæ цы арæзтæдтæ нæ фесты, ахæм бындурон цалцæджы 17 объекты. Уый тыххæй фехъусын кодта арæзтады æмæ архитектурæйы министр Моргуаты Константин. Ахæм объекттæй иу Заводскойы Краснодонскийы уынджы 280 бынатæн рæвдауæндон. Ныртæккæ объекты техникон цæттæдзинад у 90%. Нысантæм гæсгæ кæй нæ фесты куыстытæ, уый аххосаг у арæзтадон æрмæджыты æргътæ цæхгæр кæй фæуæлдæр сты, уый. Сергей Меняйло бадомдта, цæмæй подрядон организацитæ къулымпыдзинæдты тыххæй сусæг мацы кæной, æмæ æнæмæнгæй сабитæ рæвдауæндонмæ сентябры бацæуой. Эксплуатацийы раттынмæ ма рады сты скъолайы агъоммæйы цалдæр куыстуаты, уыдон техникон æгъдауæй ифтонг сты 100% онг. Дзæуджыхъæуы 19-æм микрорайоны, Джызæлы, Черменыхъæуы, Дæллаг Санибайы, поселок Новыйы æмæ ма цалдæр æндæр раны. Уымæй уæлдай, кæронмæ фæци Къостайыхъæуы æмæ Хуымæллæджы амбулаторитæ, стæй Мацутæйы фельдшерон акушерон пункт. Техникон цæстдарды службæ ныртæккæ кусы Горæтгæрон районы рынчындоны поликлиникæйы хайады документтыл дæр. Процедурæ æххæстæй куы фæуа, уæд объект ратдзысты эксплуатацийы. Уымæй уæлдай æмбырды æрныхас кодтой, 2022-æм азы кæронмæ цы объектты бындурон цалцæг æмæ рацарæзт снысан кодтой, уыдоны уавæрыл санкциты рæстæг.
