Ахæм уынаффæ хаст æрцыди æнæнхъæлæджы цаутæ иуварс кæныны къамисы æмбырды
Горæтгæрон районы сфидар кодтой æнæнхъæлæджы цауты фæтк. Ахæм уынаффæ хаст æрцыди æнæнхъæлæджы цаутæ иуварс кæныны къамисы æмбырды. Разамынд ын лæвæрдта республикæйы Сæргълæууæг Сергей Меняйло. Ацы бонты æрдзон фыдбылызтæ бахъыгдæрдтой электрон тыхдæттæг стæй газы хæтæлтæ. Уымæй уæлдай, дымгæ æмæ къæвдатæ ныппырх кодтой бирæ социалон объектты æмæ хи хæдзæртты сæртæ, цæхæрадæтты доны бын фесты зайæгойтæ. Уый та ууыл дзурæг у, æмæ зиан æрхаста фидæны тыллæгæн дæр. Æрдз тынгдæр фыдбылызтæ æрхаста Æрыдонæн, Хъæдгæронæн, Мустыздæхæн, Октябрьскæйæн, Камбилеевкæйæн æмæ Рæмонтыхъæуæн. Ныртæккæйы онг дзы цæуынц аварион – ирвæзынгæнæн куыстытæ. Тæрккъæвдаты аххосæй, гæнæн ис, æмæ Мæздæджы районы Терк йæ былтæй ракæла, тынгдæр тæссаг у Павлодольскæйы рдыгæй. Специалисттæ тæрсынц донивылдтытæй, æмæ цæттæ кæнынц, бахъуаджы рæстæг кæмæй спайда кæндзысты, ахæм фæрæзтæ. Хъæууон хæдзарады министрады бæрæггæнæнтæм гæсгæ, хъыгдард баййæфтой 2 мин гектары хуым зæххытæ. Цæмæй сæ гыццыл баххæст кæной, уый тыххæй ныхас цæуы зæхкусджытæн паддзахадон æххуыс бакæныныл. Сергей Меняйло ма бахæс кодта, цыбыр рæстæгмæ хъæутæ электрон тыхæй æмæ газæй баххæст кæнын.
