Уыцы скъолайы колледжы ахуыргæнинæгтæ сæ уæгъд рæстæг ахуыр кæндзысты канд нæ адæмы æгъдæуттæ, истори æмæ традицитæ нæ, фæлæ ма Кавказы адæмы хæттыты цардыуаджы бындуртæ дæр
Ирон æгъдæутты национ скъола базарадон-экономикон колледжы бындурыл байгом Беслæны. Уыцы скъолайы колледжы ахуыргæнинæгтæ сæ уæгъд рæстæг ахуыр кæндзысты канд нæ адæмы æгъдæуттæ, истори æмæ традицитæ нæ, фæлæ ма Кавказы адæмы хæттыты цардыуаджы бындуртæ дæр. Уымæй дарддæр фæсивæдæн арæзт цæудзысты экскурситæ нæ регионы историон æмæ сыгъдæг бынæттæм. Ирон æгъдæутты скъола байгом кæныны кадджын мадзалмæ хуынд æрцыдысты ирон адæмы Уæлдæр советы разамынды минæвар Туаты Руслан, Рахизфарсы районы Стыр ныхасы сæрдар Томайты Савелий, стæй Рахизфарсы районы сылгоймæгты советы сæрдар Тараты Люмилæ. Ирон æвзаджы ахуыргæнджытæн сæ ахадгæ куысты тыххæй радтой арфæйы фыстæджытæ. Цæгат Ирыстоны базарадон-экономикон колледжы директор Æбиты Валерийæн та йæ патриотон æмæ бæстæзонæн куысты фæдыл кадджын уавæры майдан радта ветеранты советы сæрдар Лалыты Лев.
