Уый тыххæй ныхас цыд хицауады æмбырды
Ног азæй фæстæмæ куысты мызды æппынкъаддæры бæрц фæфылдæр уыдзæн 16 мины æмæ 243 сомы онг. Раздæр та уыд 15 мины æмæ 259 сомы. Уый тыххæй ныхас цыд хицауады æмбырды. Уымæй дарддæр бæрнон кусджытæ æрдзырдтой æндæр ахсджиаг хъуыддæгтыл. 2023-æм азы, паддзахадон программæмæ гæсгæ, нысан кæнынц 40 æхсæнадон зонæмæ базилын. Равзæрстой сæ цæрджыты фæндонтæ хынцгæйæ. Уыцы хыгъдмæ хаст æрцыдысты Дигорайы æмæ Беслæны æхсæнадон территоритæ. Сæрмагондæй уымæн радих кодтой 200 милуан сомæй фылдæр. Ныртæккæ уыцы программæмæ гæсгæ аив кæнынц Алагиры аргъуаны территори æмæ Æрыдоны былгæрон. Уæвгæ та программæ арæзт у 2024-æм азмæ. Премьер Дзанайты Барис куыд загъта, афтæмæй нырыккон уавæртæ аразын у ахсджиагдæр фарста. Æмбырды ма ныхас цыд фидæны азты бюджетыл. Финансты министр Исахъты Олег куыд загъта, афтæмæй нысан кæнынц æфтиæгтæ 38 миллиардæй фæфылдæр кæнын. Хæрдзтæ та уыдзысты 39 миллиардæй фылдæр. Дефицитн сæхгæнынмæ хъавынц уæлæмхасæн æфтиæгты æмæ резервон фæрæзты фæрцы. Уыимæ республикон бюджетæн, раздæрау, уыдзæн социалон ахадындзинад. Арæзтадон æрмæг кæй фæзынаргъдæр, уымæ гæсгæ фæнд кæнынц Цæгат Ирыстонæн финансон æххуыс 70 милуан сомы онг бакæнын. Уыцы фæрæзтæ æрвыст цæудзысты адæмы кæлæддзаг хæдзæрттæй ногтæм раивыны программæйæн.
