Уыдысты Алагиры, Црауы æмæ Суададжы
«Иугонд Уæрæсе»-йы «партион десант» сбæлвырд кодта, Алагиры районы социалон объекттæ куыд реконструкцигонд цæуынц, уый. Уыдысты Алагиры, Црауы æмæ Суададжы. Æмтгæй райсгæйæ, куыстытæ хорз æххæстгонд цæуынц, фæлæ уыд фиппаинæгтæ дæр. Цавæртæ, уый тыххæй бæлвырддæр радзурдзæн Хъайтмазты Дзерассæ.
Црауы культурæйы хæдзары куыстытæ райдыдтой 6 мæйы размæ. Æххæстгонд цæуынц партион программæ «Культура малой Родины»-мæ гæсгæ. Парламенты депутат Цæгæраты Руслан куыд загъта, афтæмæй реконструкци фæнд кæнынц афæдзы кæронмæ фæуын. Культурæйы хæдзары æнæхъæнæй баивтой электрон тыхдæттæг телтæ, инженерон коммуникацитæ, базылдысты бæстыхайы сæрмæ дæр.
Алагиры музейон-равдыстадон комплекс рамбылдта грант культурон хъæппæристы президентон программæмæ гæсгæ. Дихгонд фæрæзтæй балхæдтой равдыстадон витринæтæ æмæ интерактивон стъол.
Черчесты Фатимæ – Алагиры музейон-равдыстадон комплексы директор: «Тынг æхсызгон уыд, ацы витринæтæ куы райстам, уæд. Нæ куысты гæнæнтæ фæпарахдæр сты. Уæлдайдæр та мæ фæнды зæгъын, диссаджы стъол». + «Музеймæ цæуджытæ куы æрбацæуынц, уæд дзы дуне æрмæг ссарынц ирон адæмы тыххæй. Æркæсынц æмæ ацæуынц зæрдæрухсæй».
Партийы уæнгтæ бабæрæг кодтой Суададжы культурæйы хæдзар дæр. Объекты рацарæзт кæронмæ фæхæццæ кæны, хъæуы ма базилын кæрты æмæ алфамбылай территоримæ. «Иугонд Уæрæсе»-йы регионалон хайады минæвæрттæм разынд фиппаинæгтæ дæр. Реконструкци райдыдта 2021-æм азы, уыцы рæстæгмæ аразæг компани ивд æрцыд. Фыццаг куыстуат объект афоныл не сцæттæ кодта, стæй куыстыты хай хорз нæ сæххæст кодта. Сценæ къæхты бын змæлы. Культурæйы хæдзары директор Гаситы Зарæйы ныхæстæм гæсгæ, ацы хъуыддаджы фæдыл арæзтады æмæ архитектурæйы министрадмæ сидтысты.
Республикæйы Парламенты депутат Цæгæраты Руслан загъта, æппæт фиппаинæгтæ профилон организацитæм кæй фæхæццæ кæндзысты. Инспекцийы фæстаг объект – Суададжы бастдзинады хайад. Ныридæгæн кусы, хъæуы ма баиу кæнын сигнализацийы системæ æмæ арæзтадон æрмæджыты хауæццæгтæ бафснайын. Реконструкци æххæстгонд æрцыд проект «Модернизация почтовых отделений»-мæ гæсгæ.
Цæгæраты Руслан – Республикæ Цæгат Ирыстон-Аланийы Парламенты депутат парти «Иугонд Уæрæсе»-йы фракцийæ: ИРОН «Цы федтам, уыцы куыстытæ хъуамæ афæдзы кæронмæ конд æрцæуой. Фæнды мæ зæгъын, адæм хъуамæ кæй кæсой, куыстытæ куыд цæуынц, уымæ. Уыдон улæфдзысты уым, кусгæ дæр, æмæ сæм сæхæдæг куы нæ кæсой, æмæ сæ цы хъæуы, уый куы нæ зæгъой, уæд кæмдæрты бынтон хорз конд нæ вæййынц. Мах та кæсдзыстæм, цæмæй сæ афойнадыл æмæ куыд æмбæлы, афтæ скæной. Кæмдæрты нæ зæрдæмæ нæ фæцыд. Хъæуы бакусын, цæмæй дзæбæх æмæ кæронмæ конд цы не рцыд, уыдон тагъд рæстæджы куыд сцалцæг кæной».
Партион десанты инспекци арæзт æрцыд «Иугонд Уæрæсе»-йы адæмон программæмæ гæсгæ. Партийы проекттæ куыд æххæстгонд цæуынц, уымæ цæст дарыны хæс æвæрд у æппæт къæпхæнты депутаттыл.
