Йæ нысан уыд, Цæгат Ирыстонæй сæрмагонд æфсæддон операцийы чи архайы, уыдонæн баххуыс кæнын
Паддзахадон академион ансамбль «Алан» радта хæрзаудæн концерт. Йæ нысан уыд, Цæгат Ирыстонæй сæрмагонд æфсæддон операцийы чи архайы, уыдонæн баххуыс кæнын. Зындгонд къорды артисттæ адæмы размæ рахастой сæ репертуары хуыздæр хореографион композицитæ. Билеттæй цы фæрæзтæ æрæмбырд кодтой, уыдон æрвыст æрцæудзысты æппæтуæрæсеон проект «Все для Победы»-йы фонды регионалон хыгъдмæ. Проект æххæст кæны адæмон фронт. Ансамблы разамонæг Козаты Зелимхан раарфæ кодта аивадуарзджытæн, ацы стыр хъуыддагмæ се вæрæн кæй бахастой, уый тыххæй.
Козаты Зелимхан, паддзахадон академион ансамбль «Алан»-ы аивадон разамонæг: «Ирон адæм кæддæриддæр уыдысты хæстон. Райсæм нæ истори – скифтæ, алантæ, ирæттæ. Нæ фæсивæд ацыдысты. Нæ зæрдæ сын, фыццаджыдæр, зæгъы æнæниз куыд уой, кæрæдзийы дæр уым куыд хъахъхъæной, уæлахиз куыд фæуой, æмæ сæ хæдзæрттæм дзæбæхæй куыд сыздæхой, ахæм амонд сæ уæд. Ахæм концерттæ куыд нал уа, ома, хæсты быдырмæ æххуысы концерттæ, фæлæ бæрæгбæтты æмæ хъæлдзæгдзинады куыд цæуой нæ концерттæ, ахæм амонд уæд».
Гæлиты Клим, Адæмон фронты регионалон æххæстгæнæн комитеты разамонæг Республикæ Цæгат Ирыстон-Аланийы: «Нæ салдæттæн, нæ лæппутæн, Украинæйы æфсæддон операцийы чи архайы, уыдоны æххуыс хъæуы ардыгæй. Ансамбль «Алан» уыцы куыст абон бакæндзæн. Цы сæмбырд кæной, уыцы æхцайæ æлхæд æрцæудзысты, цы хъуаг сты , уыцы гæрзмæ æмæ сын сæ арвитдзысты. Мах сын уый тыххæй стыр бузныг зæгъæм. Иннæ адæммæ сидæм, цæмæй ацы проектыл иумæйагæй бакусæм æмæ цæмæй нæ бон æххуыс кæнын уа, уый тыххæй».
