Уыдоны фæрцы мингай сывæллæттæ райстой ног зонындзинæдтæ модельтæ æмæ программæтæ аразынæй, туризмы æмæ æндæр нырыккон ахсджиаг къабæзты
Республикæйы æнтыстджынæй æххæстгонд цæуынц 2 федералон проекты – «Фидæнмæ билет» æмæ «Æрыгон профессионалтæ». Уыдоны фæрцы мингай сывæллæттæ райстой ног зонындзинæдтæ модельтæ æмæ программæтæ аразынæй, туризмы æмæ æндæр нырыккон ахсджиаг къабæзты. Стыр æргом здæхт æрцыд, йе нæниздзинад хъыгдард кæмæн у, уыцы адæммæ дæр. Проекттæ æххæстгонд цыдысты республикæйы сæрмагонд цæттæгæнæн центры бындурыл. Бæлвырддæр хабæрттæ радзурдзæн Хъайтмазты Дзерассæ.
Валерия Паар у 3D моделированийы ахуыргæнæг. Къæпхæнгай сывæллæтты ахуыр кæны бæрцуатон фигурæтæ кæнын. Райдайынц хуымæтæг геометрион объекттæй. Валерия куыд зæгъы, афтæмæй йын ахсджиаг у, сывæллæттæн бамбарын кæнын æрмæст куыд кусын хъæуы, уый нæ, фæлæ ма раиртасын, программæимæ архайын кæмæн æнтысы, уыдоны.
Ацы дæсныйад у рæстæджы домæн. Гулуты Сæрмæтæн 3D моделировани æнæзонгæ нæу. 14-аздзыд лæппу ныридæгæн исы бындурон зонындзинæдтæ ацы къабазы. Фидæны Сæрмæт фæнд кæны компьютерон хъæзтытæ цæттæ кæнын.
Алексей ШинкарЕв ахуыр кæны веб-программированийы курсыты. Йæ бæллиц у æнцонæмбарæн сайттæ кæнын. Зоны, сайт цавæр хæйттæй кæнгæ у, уый.
Проект «Фидæнмæ билет»-ы бацархайдта 3 мин скъоладзауæй фылдæр 6-мæй 11-æм къласы онг. Сывæллæттæн сарæзтой мин профориентацион урокæй фылдæр.
Хатдзæгтæгæнæн аттестаци сæрмагонд цæттæгæнæн центры ацыдысты экскурсоводты æххуысгæнджытæ дæр. Æвзæр чи уыны æмæ хъусы, уыцы скъола-интернаты ахуырдзаутæ ног дæсныйадыл ахуыр кодтой цалдæр къæпхæнмæ гæсгæ. Ныр сæ бон у аразын экскурситæ Дзæуджыхъæуы историон центры æмæ Куырттаты комы. Цымыдисаг балц сарæзтой не сфæлдыстадон къордæн дæр.
Екатерина Селезнева у сæрмагонд цæттæгæнæн центры педагог. Йæ курсы сывæллæттæн дзырдта историйы æмæ культурæйы тыххæй. Ахуырты рæстæг ын æххуыс кодтой, куыд интернаты ахуыргæнджытæ, афтæ сывæллæттæ сæхæдæг дæр.
Программæ «Æрыгон профессионалты» йе нæниздзинад хъыгдард кæмæн у, уыцы адæмæн ис цæттæ кæныны 3 къабазы. Ахуыртæ цыдысты мæй æмæ рдæг. Уыдоны фæрцы туризмы райрæздзæн инклюзивон къабаз.
