Документыл бакуыстой Мæскуыйаг сæрмагонд корпораци «Строй Инвест Проект»-ы æмæ Санкт-Петербурджы транспортон системæйы институты специалисттæ
Транспорты æмæ фæндаггон инфраструктурæйы комитеты арæзт æрцыд Дзæуджыхъæуы æхсæнадон транспорты пъланы æмæ адæмæн лæггад кæныны комплексон схемæйы презентаци. Документыл бакуыстой Мæскуыйаг сæрмагонд корпораци «Строй Инвест Проект»-ы æмæ Санкт-Петербурджы транспортон системæйы институты специалисттæ. Ног схемæ сфидар кæныны нысан у, Дзæуджыхъæуы æмæ, æмтгæй райсгæйæ, республикæйы саразын ахадгæ маршрутон хыз, бæлццæтты æнæ къуылымпытæй ласын бæлвырд фæткмæ гæсгæ, цæрджыты домæнтæ ацы къабазы хуыздæр æххæст кæнын. Презентацимæ æрбахуыдтой районты администрациты сæргълæуджыты хæдивджыты дæр. Санкт-Петербурджы транспортон системæйы институты генералон директор Александр Беспалов бæлвырд радзырдта ног схемæйы тыххæй. Транспорты æмæ фæндаггон инфраструктурæйы комитеты сæрдар Солиты Тариэль уазджытæн раарфæ кодта, цы куыст бакодтой, уый фæдыл. Ныр республикæйы транспортон къабазы минæвæртты хъæуы иртæстыты хатдзæгтæн анализ скæнын, цалдæр азæн снысан кæнын, райст амындтытæ æххæст кæныны къæпхæнтæ æмæ се *мгъуыд, стæй фæрæзтæ кæцæй радих кæндзысты, уый.
Джидзæлаты Хазби, РЦИ-А транспорты æмæ фæндаггон инфраструктурæйы комитеты сæрдары хæдивæг: «Районты Хицауадимæ алы бон дæр фæныхас кæнæм. Уыцы документтæ куы скодтой, уæд сæм сæ арвыстам, цыдæр ивддзинæдтæ дзы снысан кодтой. Уыдонмæ дæр байхъуыстам. Нæдæхæг дæр лæмбынæг æркастыстæм, æмæ кæмдæр цыдæр ивддзинæдтæ бахастам. Чи сæ цæттæ кодта, уыдон уыцы хъуыддæгтæм æркастысты, æмæ мах куыд фæндыди – мах ам стæм, æмæ йæ хуыздæр зонæм, куыд хъуамæ уа, -уыцы ивддзинæдтæ бахастой. Æмæ уыцы документ афтæмæй райгуырд».
