Федералон ведомствæйы иннæ минæвæрттимæ аргъ скодта республикæйы электрон тыхы хызты комплексы уавæрæн
Цæгат Ирыстоны кусæг балцы уыд Уæрæсейы энергетикæйы министрады артаджы æмæ энергетикон комплексы оперативон управленийы департаменты директор Елена Медведева. Федералон ведомствæйы иннæ минæвæрттимæ аргъ скодта республикæйы электрон тыхы хызты комплексы уавæрæн. Ацы фарстайы фæдыл кусæг къорды архайджытæ бабæрæг кодтой цалдæр профилон организацийы. Хатдзæгтыл æрдзырдтой сæрмагонд хицауадон æмбырды. Амыдта йæ вице-премьер Икъаты Русланбег. Куыд загъта, афтæмæй электрон тыхæй æххæст кæныны къабазы ахадгæ куыст бæрзонддæр кæнын ахсджиаг у. Уый ратдзæн, адæм цы лæггæдтæ исынц, уыдоны хæрзхъæддзинад фæхуыздæр кæныны фадат. Елена Медведевайы ныхæстæм гæсгæ, ацы хъуыддаг актуалон у бæстæйы се *ппæт регионты дæр. Зæрдыл æрлæууын кодта, фылдæр закъонхæлдтытæ кæй æрцæуы электрон тыхуарæг хызты, фыццаджыдæр, чысыл территориалон организациты бæрны чи сты, уыцы объектты. Департаменты директор куыд загъта, афтæмæй ацы фарстатæ алыг кæнынæн федералон министрады хъæппæрисæй снысан кодтой территориалон организацитæн бæлвырд домæнтæ. Ногдзинæдты фæрцы къабазы мин авдсæдæ организацийæ баззайдзæн цыппарсæдæ компанийы бæрц. Уыдонæн сæ бон уыдзæн энергийæ æмбæлгæ æмвæзадыл æххæст кæнын. Дзырдтой, кæй цæттæ кæнынц нормативон-барадон бындурмæ ног ивддзинæдтæ. Уыдонмæ гæсгæ, сæ статус цы территориалон организацитæн ист æрцæуа, уыдоны объекттæ, бафидар кæндзысты алы регионы стырдæр профилон организацийыл. Елена Медведевайы ныхæстæм гæсгæ, республикæйы электрон тыхдæттæг хызты баиу кæныны мгъуыд фæтагъддæр кæнын хъæуы, цæмæй сæ дарддæры райрæзтæн фидар бындур æвæрд æрцæуа, уый тыххæй. Ацы хъуыддаджы сæрмагонд бынат ахсы регионалон хицауадон оргæнты куыст.
