Фæрæзтæ дихгонд цæудзысты федералон бюджетæй
Республикæйы Парламенты депутаттæ рахæцыдысты, 19 азы онг кæуыл цæуы, уыцы категорийы адæмæй стæм низтæй рынчын чи у, уыдоны паддзахады хардзæй зынаргъ хостæй ифтонг кæныны хъæппæрисы фарс. Фæрæзтæ дихгонд цæудзысты федералон бюджетæй. Парламентаритæ хорзыл банымадтой Ханты-Мансийскы автономон зылды Думæйы курдиат бæстæйы профилон ведомствæмæ. Ныртæккæ стæм низтæй рынчын сывæллæтты дзæбæх кæныны мадзæлттæ æххæстгонд цæуынц регионалон бюджетæй. 19 азæй фылдæр кæуыл цæуы, уыцы пациентты 2024-æм 26-æм азты хостæй хъуамæ ифтонг кодтаиккой регионалон бюджетæй. Депутатты хъуыдымæ гæсгæ, регионты бюджеттæ ууыл нæ аххæсдзысты. Парламенты æмбырды ма ныхас цыди регионалон æмæ бынæттон нысаниуæг кæмæн ис, уыцы фæндæгты рацарæзты паддзахадон программæ куыд æххæстгонд цæуы, ууыл. Транспорты æмæ фæндаггон инфраструктурæйы комитеты сæрдар Солиты Тариель куыд фехъусын кодта, афтæмæй ивгъуыд азы фæндаггон-транспорты комплексы рæзтæн фæрæзтæ дихгонд æрцыди 9 миллиард сомы бæрц. Æхцайы æртыккаг хай радтой республикæйы бюджетæй.
