Амыдта йæ Уæрæсейы экономикон рæзты министры хæдивæг Сергей Назаров
Хицауады сæрдар Дзанайты Барис видеобастдзинады фæрцы архайдта фыццаг Кавказаг инвестицион равдыстимæ баст æмбырды. Амыдта йæ Уæрæсейы экономикон рæзты министры хæдивæг Сергей Назаров. Ныхас кодтой мадзалмæ цæттæ кæныны фарстайыл. Инвестицион равдыст уыдзæн 4-5-æм майы бирæвæрсыг равдыстадон центр «МинводыЭКСПО»-йы фæзы. Цæгат Ирыстон йæ инвестицион гæнæнтæ рахæсдзæн хицæн стендмæ. Йæ фæзуат уыдзæн 60 квадратон метры. Презентаци дзы кæндзысты 5 проекты: агропромышленнон æмæ транспортон-логистикон комплекс, ног туристон маршрутты райрæзт, балер кæсаджы хæдзарады æмæ туристон-рекреацион комплекс «Мамысон»-ы арæзтад. Стенды дизайн-макет æвдисдзæн регионы бирæнацион æмæ бирæконфессион хуыз. Уымæй уæлдай ма, йæ нысан уыдзæн равдисын регионы дарддæры райрæзт национ традицитæ хъахъхъæнгæйæ. Гæнæн ис, æмæ мадзалы куыст æххæстгæнгæйæ Цæгат Ирыстон бафысса æмгуыстады тыххæй инвестицион бадзырдтæ. Фæнд ма кæнынц саразын, республикæйы хойраджы къабазы продукцийы дегустаци æмæ равдисын рог промышленносты куыстуæтты товартæ. Æмбырды хатдзæгтæм гæсгæ Дзанайты Барис профилон ведомствæты минæвæрттæн бабар кодта, равдыстмæ сæрмагондæй бацæттæ кæнын, цæмæй республикæ мадзалы бæрзонд æмвæзадыл æвдыст æрцæуа, уый тыххæй.
