Ууыл ныхас цыди аппаратон æмбырды
Сергей Меняйло бахæс кодта, 2023-æм азы ахуыр чи фæци, уыцы æрыгон педагогтæн уæлæмхасæн фиддонтæ снысан кæнын. Ууыл ныхас цыди аппаратон æмбырды. Фæрæзтæ сын бафиддзысты, æрмæстдæр республикæйы скъолатæм æмæ рæвдауæндæттæм кусынмæ куы бацæуой, уæд. Уымæй уæлдай, республикæйы сæргълæууæг ахуырад æмæ наукæйы министрадæн бахæс кодта, цæмæй райдайа профориентацион кампани. Университеты абитуриенттæн снысан кодтой сæрмагонд бонтæ, сæ бон у æрбацæуын æмæ базонгæ уæвын уæлдæр ахуыргæнæндоны куыстимæ. Министр Алыбекты Эллæ куыд загъта, афтæмæй æнтыстджынæй кусын райдыдта иумæйаг паддзахадон фæлварæнмæ кæм цæттæ кæнынц, ахæм скъола. Ныртæккæ дзы ахуыр кæны 3 мин хистæркъласоны. Ахуыртæ къуыри дыууæ хатты цæуынц 11 предметæй. Республикæйы скъолаты фæнд кæнынц нырыккон интеллектуалон системæ ныффидар кæнын. 2 къуырийы фæстæ фæзындзæн республикæйы физикон-математикон лицейы.
Сергей Меняйло профилон ведомствæйæн бахæс кодта, республикæйы районты цы культурон хæзнаты цыртдзæвæнтæ ис, уыдоны алыварс санитарон фæзуæттæ скæнын. Ацы хъуыддаг ныридæгæн сырæзти Цымытийы хъæуы. Ацы мадзæлттæ хъæуынц, цæмæй цыртдзæвæнтæм хæстæг дзæгъæл арæзтæдтæ ма фæзына, уый тыххæй, загъта сæргълæууæг. Кæд æмæ дзы уæддæр, ахæм арæзтæдтæ фæзына, уæд та сæ райхалыны фарстайыл кусдзæн тæрхондон. Ныртæккæ райдыдтой Уæлахизы бонмæ цæттæгæнæн мадзæлттæ. Районты сæргълæуджытæн республикæйы разамонæг бадомдта, æфсæддон намысы мемориалтæ æмæ æфсымæрон ингæнтæм базилын. Уымæй уæлдай, Сергей Меняйло бахæс кодта, медицинон куыстуæттæ бабæрæг кæнын, æмæ базонын дохтыртæн фиддонтæ æххæстæй лæвæрд цæуынц, æви нæ, уый. Вице-премьер Александр Реутовы ныхæстæм гæсгæ, ахæм бæрæггæнæн мадзæлттæ ныртæккæ цæуынц тагъд æххуысы станцæйы.
