Уый тыххæй Фæлхасадмæ цæсдарды управленийы минæвæрттæ фехъусын кодтой аппаратон æмбырды
Цæгат Ирыстоны эпидемиологон уавæр у рæстæмбис. Уый тыххæй Фæлхасадмæ цæсдарды управленийы минæвæрттæ фехъусын кодтой аппаратон æмбырды. 5 сывæллоны та дзуарæй дзæбæх кæнынц республикæйы сывæллæтты клиникон рынчындоны. Æмбырды ныхас цыди иумæйаг паддзахадон фæлварæнмæ цæттæ кæныны фарстатыл дæр. Хъæугæ техникон фæрæзтæ ныридæгæн сты цæттæ, къуылымпыдзинæдтæ дзы хъуамæ ма уа. Ацы аз республикæйы иумæйаг паддзахадон фæлварæн дæтдзысты 2 мины 6 сæдæ рауагъдоны, уыдонæй 41 сты Хуссар Ирыстонæй, загъта министр Алыбекты Эллæ. Сергей Меняйло бафарста, культурон нысаниуæг кæмæн ис, уыцы историон цыртдзæвæнтæ сног кæныны хъуыддаг куыд цæуы, уый тыххæй. Уый уыди, æрæджы Сæргълæууæгæн ЦИПУ-йы студенттимæ цы фембæлд уыди, уый сæйраг темæ. Снысан кодтой сæрмагонд къордтæ æмæ сæ разамонджыты. Мин 3 сæдæ объектæй студенттæ сæхæдæг равзардзысты тынгдæр сын цымыдисаг чи у, ахæмтæ. Сергей Меняйло бахæс кодта, куыстытæ бæрæгбæтты фæстæ райдайын. Æрныхас кодтой сæрдыгон фæлладуадзæн-дзæбæхгæнæн кампанийыл дæр. Ныртæккæ бæрæггæнæн мадзæлттæ цæуы рæзгæ фæлтæр сæ фæллад кæм уаддзысты, уыцы объекттæ. Вице-премьер Тугъанаты Ларисæйы ныхæстæм гæсгæ, 133 организацийæ бардæттæг гæххæттытæ ис æрмæстдæр 109-мæ. Ацы аз се нæниздзинад фæфидар кæндзысты 36 мин сывæллоны.
