Стыр æргом аздæхтой, бынæттон æмæ республикон бюджетты фæрæзтæй цы энергоресурсты компанитæ кусынц, уыдоны фарстатæм
Цæрæнуæтты-коммуналон хæдзарады комплексы куыстуæтты архайдыл æрныхас кодтой, Дзанайты Барисы разамындæй арæзт æмбырды. Стыр æргом аздæхтой, бынæттон æмæ республикон бюджетты фæрæзтæй цы энергоресурсты компанитæ кусынц, уыдоны фарстатæм. Хицæн ныхас цыд бирæфатерон хæдзæртты бындурон цалцæджы программæ царды æххæст кæныныл, стæй хъæбæр хауæццæгты куыстгæнæг регионалон операторты архайдыл. Дзæуджыхъæуы газуарæн компанийы генералон директор Хъодзаты Алан фехъусын кодта бюджетон къабазы абонентты æмæ цæрæнуæтты-коммуналон хæдзарады комплексы фиддонты тыххæй, ацы азы фыццаг кварталæн. Афтæмæй газы фиддонты бæрц январæй-мартъийы онг сси 86,2%. Дзæуджыхъæуы абонентты фиддонты бæрц та у 99,3%. Къаддæр нымæцтæ æвдисынц республикæйы цалдæр районы. Дзанайты Барис муниципалитетты сæргълæуджытæн бабар кодта фарстамæ æркæсын æмæ йæ цыбыр æмгъуыдмæ алыг кæнын. Æххæстгæнæн хицаудзинады оргæнты æмæ администрациты разамонджытæн премьер бабар кодта, коммуналон лæггæдтæн 100% фиддонтыл бацархайын. Уыимæ бирæфатерон хæдзæртты бындурон цалцæгæн фиддонтæ хуыздæр æмбырд кæнын райдыдтой. Уый тыххæй фехъусын кодта бындурон цалцæджы Фонды генералон директор Теттаты Рамазан. 43 хæдзары баивтой 44 лифты. 19 объекты та баивтой хæдзары сæртæ æмæ инженерон системæтæ. Ацы азы фыццаг кварталмæ цæрджытæ бындурон цалцæгæн бафыстой 53 милуан сомы.
