Республикæйы разамонæг куыд фæбæрæг кодта, афтæмæй æмбары, нæ регионы цы риссаг фарстатæ æрæмбырд, уыдон æмæ цæттæ у бæлвырд æрдзурын, хуыздæр куыд алыг кæнгæ сты, ууыл
Цæгат Ирыстоны сæргълæууæг Сергей Меняйло дзуæппытæ радта республикон æмæ федералон дзыллон коммуникациты фæрæзты минæвæртты фæрстытæн. Æрвылазон пресс-конференци ацыд национ телеканал «Осетия-Ирыстоны» комкоммæ эфиры. Республикæйы разамонæг куыд фæбæрæг кодта, афтæмæй æмбары, нæ регионы цы риссаг фарстатæ æрæмбырд, уыдон æмæ цæттæ у бæлвырд æрдзурын, хуыздæр куыд алыг кæнгæ сты, ууыл. Транспорты райрæзтыл дзургæйæ, Сергей Меняйло загъта, нæ республикæйæн кæй аразынц транспорты фæткы хуызæг. Цæмæй проект царды рауадзой, уый тыххæй регионы балхæнын хъæуы æппынкъаддæр 157 ног автобусы. Ацы азы кæронмæ республикæ райсдзæн бæлццæттæласæг дыууын транспорты фæрæзы. Сергей Меняйло куыд загъта афтæмæй сцæттæ ис иумæйаг транспортон картæ. Валидатортæ та сæвæрдтой 67 ног автобусыл. Афтæмæй тагъд рæстæг республикæ рацæудзæн иумæйаг тарифмæ. Уыимæ амалхъомады минæвæрттæн уыдзæн гæнæн транспорты къабазы сæ куыст дарддæр хæццæ кæнынæн – зæрдæ бавæрдта Сергей Меняйло. Уымæй дарддæр ныхас цыд завод «Электроцинчы» исбон республикæйы бæрнмæ бахæссыныл, футболон клуб «Алани»-йæн Премьер-лигæйы архайынæн лицензи райсыныл. Уæлдай æргом аздæхта фæсивæды патриотон хъомыладмæ.
