3 цæгатирыстойнаг рауагъдоны уырыссаг æвзагæй, химийæ æмæ математикæйæ радтой бæрзонд æмвæзадыл
Иумæйаг паддзахадон фæлварæн 100 баллæн радтын. 13 цæгатирыстойнаг рауагъдоны уырыссаг æвзагæй, химийæ æмæ математикæйæ радтой бæрзонд æмвæзадыл. Райстой сæдæгай баллтæ. Бирæ азты цы зонындзинæдтæ æмбырд кодтой, уыдон сæ ныр бахъуыдысты æмæ сæ спайда кодтой æххæстæй. Фæлварæнтæ иттæг хорз чи радта, уыдонæй цалдæримæ фембæлд не сфæлдыстадон къорд. Бæлвырддæр – Касаты Наирæ.
Иумæйаг паддзахадон фæлварæн радтыны зæрдæхсайæн рæстæг Кцойты Владимирæн кæронмæ æрхæццæ. Иннæмæй та, рауагъдон ахæм хиуылхæцтæй зыны, æмæ зын бауырнæн у, ахуырады ацы къæпхæн ын тынг зын уыди, уый. Скъоладзау уырыссаг æвзагæй райста æппæтæй уæлдæр бæрæггæнæн. Беслæны 8-æм скъолайы ахуырдзау республикæйы сси æнæмæнг фæлварæнæй 100 баллы чи райста, уыцы 6 рауагъдонæй иу.
Лæппу æнæрхъуыдыйæ нæ уагъта скъолайы цард дæр. Архайдта брейн-рингты, олимпиадæты, алыхуызон интеллектуалон конкурсты æнтыстджынæй хъахъхъæдта скъолайы кад. Сабыр, хиуылхæцгæ, фæразон. Йæ зонындзинæдтыл æууæнды æххæстæй. Директоры ныхæстæм гæсгæ, Вовæ ахæм у æмæ уыд алкæддæр. Ныр та йæ ных сарæзта физикон-математикон къабазмæ. Æмæ дызæрдыггаг нæу, уым дæр йæхи дæнцæгæн æрхæссинагæй кæй равдисдзæн, ууыл.
Йæ зонындзинæдтæ æмæ йæ хъарутыл дызæрдыг нæ кодта Дзæуджыхъæуы 5-æм гимназы рауагъдон Дзесты Батраз дæр. Иуæндæсæмкъласон профилон математикæ радта 100 баллæн. Батраз цыфæнды уавæры дæр пайда кæны иу хуымæтæг фæткæй – адæймаг мæт куы кæна, уæд уый хъуыддаг къуылымпы кæны. Уыцы хъуыдытимæ цыди фæлварæнмæ дæр.
Батраз снысан кодта йæ фидæн IT къабазимæ сбæттын. Бындуронæй ахуыр кæны математикæ. Архайы программæтæ аразыныл. Уæвгæ, диссаг дæр нæу, бæлвырд наукæтæм æмхицдзинад æм ис йæ мадæй. Уый дæр у информатикæйы ахуыргæнæг.
Алы рауагъдоны дæр, уыимæ, сæ ныййарджыты дæр иу кæны иумæйаг хъуыддаг. Тыхсынц сæ кæстæрты фæлварæнты хатдзæгтыл. Ныр уыцы рæстæг фæстейы баззад. Разæй сæм æнхъæлмæ кæсынц фæлладуадзæн бонтæ. Уый фæстæ та, ног æмæ цымыдисаг цардвæндаг.
