Йæ кафæн курдиатæн ын аккаг аргъ скæнын зын у
Уæрæсейы Федерацийы сгуыхт артист, Цæгат æмæ Хуссар Ирыстоны адæмон артист Плиты Нодар сбæрæг кодта йе 75 азы юбилей. Йæ кафæн курдиатæн ын аккаг аргъ скæнын зын у. Алы азты уыд алыхуызон номдзыд ансамбльты солист. Абон дæр йæ цард баст у сценæимæ. Хореографийы сусæгдзинæдтæ амоны рæзгæ фæлтæрæн. Æмæ куыд зæгъы, афтæмæй, уый бæрнон хъуыддаг у. Юбиляры цардвæндаджы тыххæй радзурдзæн Хъайтмазты Дзерассæ.
Гуджареты комы хæххон хъæуы райгуыргæйæ, кафæн сценæйы стъалы суыдзæн, уый æнхъæл нæ уыд. Плиты Нодары фæндыд æфсæддон суæвын. Службæ кодта æфсæддон-денджызон флоты дæлдон науы, цыд Цæгатаг полюсмæ, уый фæстæ та æрзылд дунейы бæстæтыл. Нырма скъолайы ахуыргæнгæйæ, Нодар фæнд кодта йæ фидæн авиацийымæ сбæттын – хъавыд тæхæг училищæмæ бацæуын. Фæлæ йæ цардвæндаг æндæрхуызон рауад.
56 азы сценæйы. Кафыд «Кабардинка»-йы, «Лезгинка»-йы, «Вайнах»-ы, ансамбль «Алан»-ы æмæ Гуырдзыстоны паддзахадон академион балеты. Европæ, Ази, Африкæ, Латинаг Америкæ æмæ ма суанг Аляскæ дæр – цавæрфæнды сценæмæ дæр рацæугæйæ-иу, Плиты Нодар йе гæрон курдиатæй уайтагъд ссардта фæндаг аивадуарзджыты зæрдæтæм.
Ныртæккæ Нодар кусы сывæллæттимæ. Куыд зæгъы, афтæмæй уый стыр бæрнондзинад у. Тынг фæмæт кæны, искæмæн цавæрдæр элемент скæнын куы нæ фæуайы, уæд. Хъæуы бамбарын кæнын, алы змæлды нысан дæр, уымæн æмæ кæфтытæн ис сæхи философи.
Нодар, раздæрау, йæ куыстыл у иузæрдион. Алыхуызон уавæрты сæрты ахизгæйæ, сценæ нæ ныууагъта, уымæн æмæ йæ хъару æмæ æнæниздзинад дæттынц, ацы дæсныйады дарддæр архайыны фадат.
Йе 75 азыл Нодар сæмбæлд сценæйы, æмæ дарддæр дисы æфтауы йæ дæсныдзинадæй – уый сæвзæрд йæ диссаджы курдиатæй, стыр фæллойæ æмæ, зæгъæн ис, æнæнхъæлгæдзинадæй. Æмæ, æвæццæгæн, уый хонынц хъысмæт.
