Сæ размæ сын сæвæрдта бæлвырд хæстæ æмæ нысантæ, Запорожьейы облæсты Черниговы районы инфраструктурæ сног кæныны тыххæй
РЦИ-А Сæргълæууæг Сергей Меняйлойы разамындæй ацыд Хицауады уæнгтимæ æмбырд. Сæ размæ сын сæвæрдта бæлвырд хæстæ æмæ нысантæ, Запорожьейы облæсты Черниговы районы инфраструктурæ сног кæныны тыххæй. Уый у Уæрæсейы ног регионтæй иу, æмæ йын æххуыс кæныны хæс республикæ райста йæхимæ. Цæгат Ирыстоны разамонæг зæрдыл æрлæууын кодта, муниципалитеты хицауадимæ æрæджы цы бадзырд фыст æрцыди, уый. Сергей Меняйло куыд загъта, афтæмæй цы сæрмагонд мадзæлтты пъланыл бакуыстой, уым бæлвырдæй амынд ис – Черниговы районы цæрæнуæтты-коммуналон хæдзарады объекттæ рацаразын, фæндæгтæ дзы сцалцæг кæнын, ахуыргæнæндæттæм базилын æмæ дзы ахуыры процесс снывыл кæнын. Нæ республикæйы хицауадыл ма ис Черниговы район фæззыгон-зымæгон сезонмæ бацæттæ кæныны хæс дæр. Æмбырды архайджытæ куыд фæнысан кодтой, афтæмæй ныртæккæ уыцы регионы цæрджытæн хуымæтæг рæстæг не скодта, уымæ гæсгæ, æфсымæрон адæмы цур хъæуы балæууын æмæ сын баххуыс кæнын. Бирæ куыстытæ ныридæгæн æххæстгонд цæуынц, фæлæ ма цæст æрдарын хъæуы къорд фарстатæм. Куыст саразын хъæуы афтæ, цæмæй адæм сæхиуыл не ххуыс банкъарой, æмæ йæ зоной, иунæг кæй не сты, уый. Куыстытæ сæххæст кæнын хъæуы, бюджеты фæлгæты. Мадзæлтты пълан у бæрæггонд, загъта Сергей Меняйло. Уымæй уæлдай, Цæгат Ирыстоны ахуырад æмæ наукæйы министрады хъæппæрисæй, Черниговы районы библиотекæтæн, æмæ скъолатæн, нæ республикæйы цæрджытæ æмбырд кæнынц аивадон литературæ дæр.
