Архайдтой дзы республикон æмæ муниципалон дзыллон информацийы фæрæзты разамонджытæ
Цæгат Ирыстоны мыхуыры, дзыллон коммуникациты æмæ чингуытæ уадзыны къабазы фидæныл ныхас цыд Хицауады æмбырды. Архайдтой дзы республикон æмæ муниципалон дзыллон информацийы фæрæзты разамонджытæ. Сæйраг темæты хсæн – газеттæ æмæ журналтæ рафыссыны кампани, материалон-техникон бындур фидар кæнын, кадртæ цæттæ кæнын. Уæлдайдæр та иронау чи фыссы, ахæмты. Паддзахадон программæ «Ирон адæмы национ-культурон рæзт» æххæст кæнгæйæ, цæттæ кæнынц специалистты. Уыдон хæстæгдæр рæстæг фæхъæздыгдæр кæндзысты Цæгат Ирыстоны дзыллон информацийы фæрæзты рæнхъытæ. Комитеты архайды иннæ ахсджиаг къабаз – периодикон æмæ чиныгуадзæн продукци адæммæ хæццæ кæнын. Сæромагондæй уый тыххæй та ведомствойы нысанты ис – киосктæ æмæ æндæр уæй кæныны пункттæ фæфылдæр кæнын. Уым парахатæй уыдзæн газеттæ, журналтæ æмæ чингуытæ балхæныны фадат.
