Федтой, социалон объектты бындурон цалцæг æмæ æхсæнадон территоритæ куыд аив кæнынц, уый
Хицауады сæрдар Дзанайты Барис министртимæ æмæ комитетты разамонджытимæ бабæрæг кодта Горæтгæрон район. Федтой, социалон объектты бындурон цалцæг æмæ æхсæнадон территоритæ куыд аив кæнынц, уый. Лæмбынæгдæр æппæт фарстатыл æрныхас кодтой Хицауады æмбырды. Бæлвырддæр хабæрттæ радзурдзæн Хъайтмазты Дзерассæ.
Камбилеевскæйы 1-æм скъолайы бындурон цалцæг райдыдта фарон 1-æм апрелы. Ныртæккæ куыстытæ фесты. Баззадис ма чысыл фиппаинæгтæ сраст кæнын. Хицауады Горæтгæрон районмæ рацæугæ æмбырды рæстæг арæзтады æмæ архитектурæйы министры хæстæ рæстæгмæ æххæстгæнæг Атарты Георгий федта цалцæггонд скъола.
Аивгонд агъуыстытæ, нырыккон коммуникацитæ, райдзаст кълæстæ – ахæм у ныр 1-æм скъола. Цæмæй дзы фылдæр бынат уа, уый тыххæй фæфылдæр кодтой кабинетты нымæц.
Ног бæстыхай фæзындзæн Октябрьскæйы бирæвæрсыг центрæн дæр. Арæзтад фæнд кæнынц Цæгат Ирыстоны социалон-экономикон райрæзты программæмæ гæсгæ. Куыстытæ райдайдзысты иннæ аз. Ныртæккæ центр архайы арендæйы ист бæстыхайы.
Горæтгæрон районы саив кодтой 26 æхсæнадон территорийы. Азы кæронмæ ма базилдзысты 2 объектмæ. Уыдонæй иу Ногиры. Спортивон æмæ сывæллæтты фæзтæ, бандæттæ, фонтан, амфитеатр, тезгъогæнæн хай. Сентябры райдиан æхсæнадон территорийы 2 гектарæй рауайдзæн фæлладуадзæн зонæ.
Ногиры амбулатори рæстæгмæ йæ дуæрттæ сæхгæдта хъæуы цæрджытæн. Азы кæронмæ медицинон кусæнуат бындуронæй цалцæггонд æрцæудзæн. Иу радмæ йæ бабæрæг кæныны фадат уыдзæн 100 адæймагæн. Фæнд ма кæнынц амбулатори хъæугæ кусæнгæрзтæй баххæст кæнын. Æнæниздзинадхъахъхъæнынады министр Тебиаты Сосланы ныхæстæм гæсгæ, цалцæг цæуы пъланмæ гæсгæ.
Æдæппæтæй Цæгат Ирыстоны æххæстгонд цæуы 5 ахадгæ проекты. Сæ фæрцы куысты бынæттæй æххæстгонд æрцæудзæн 8 мин адæймаджы. Ацы къорды стырдæр инвестпроекттæй иуыл нымад у хъæрмуатон комплекс. Хæдзарады фæзуат у 60 гектарæй фылдæр. Хицауады сæрдар Дзанайты Барис бынаты федта, куыст куыд цæуы, уый.
Рацæугæ æмбырды Хицауады уæнгтæ æрдзырдтой ахсджиаг фарстатыл. Темæтæй иу – Цæгат Ирыстоны Парламент 2 республикон газеты бындурæвæрджыты хыгъдæй кæй рацыд, уый. Уыимæ сæ сыфтыл закъонадон оргæны архайды тыххæй æрмæджытæ мыхуыр кæныны бар баззад. Сбæрæг ма ис, 2 азмæ республикæйы медицинон уагдæтты ифтонгæн 2 миллиард сомы дихгонд кæй æрцыд. Уыцы фæрæзтæй балхæдтой кусæнгæрзты 270 иуæджы.
2 азмæ Горæтгæрон районæн радих кодтой 3 миллиард сомы бæрц. Фæрæзтæ схардз кодтой социалон инфраструктурæйы модернизацийыл æмæ цæрджытæн æххуысыл.
