Балцы нысан – рауагъдады куыстимæ бæстондæрæй базонгæ уæвын, стæй сын сæ лыггæнинаг фарстаты баххуыс кæнын
РЦИ-А хицауады сæрдар Дзанайты Барис Дзæуджыхъæуы бабæрæг кодта фыццаг æмæ егъаудæр национ рауагъдад «Ир». Балцы нысан – рауагъдады куыстимæ бæстондæрæй базонгæ уæвын, стæй сын сæ лыггæнинаг фарстаты баххуыс кæнын. Премьеримæ ныхасгæнгæйæ, редактортæ æмæ техникон кусджытæ радзырдтой сæ куысты лыстæг хъуыддæгты тыххæй. Авторты къухфыстытæй райдай, æмæ чиныг мыхуыры рауадзыны онг. Национ рауагъдад «Ир»-ы сæйраг хæс у, куыд Цæгат, афтæ Хуссар Ирыстоны фысджыты, ахуыргæндты æмæ педагогты авторон куыстытæ адæмы размæ хæссын. Ирон æмæ дзы уырыссаг æвзæгтыл уадзынц аивадон, наукон, ахуырадон æмæ методикон литературæ. Дзанайты Барисæн куыстуаты директоры хæстæ æххæстгæнæг Боцуаты Алан куыд загъта, афтæмæй ныртæккæ кусынц 60 бынæттон авторимæ. Уый хыгъд фæстаг азты специалистты куыст фæкъаддæр. Национ рауагъдады сæ куысты цы къуылымпыдзинæдтимæ æмбæлынц, уыдоныл та æрныхас кодтой республикæйы мыхуыры æмæ дзыллон коммуникациты комитеты, профилон министрад æмæ ведомствæты разамынд дæр кæм архайдтой, уыцы æмбырды фæлгæты. Фыццаджыдæр хъæуы фæегъаудæр кæнын, хъæуы цы продукци уадзынц уый, цæмæй рауагъдад куса æппæт тыхтæй. Дзанайты Барис бахæс кодта, цæмæй цыбыр рæстæгмæ бацæттæ кæной, куыстуат иттæг хорз æмвæзадмæ чи ракæндзæн, ахæм модель. Уавæрæн хъæуы анализ скæнын, æмæ бæлвырд, стæй ахадгæ хъæппæристæ бахæссын.
