Бындурон цалцæггæнæн куыстытæ райдыдтой ивгъуыд аз ноябры
Дзæуджыхъæуы дарддæр цæуы горæты Доны станцæйы егъау рацарæзт. Бындурон цалцæггæнæн куыстытæ райдыдтой ивгъуыд аз ноябры. Фыццаг къæпхæны нысан кæнынц цадты былгæрæттæ бафидар кæнын, коммуналон хызтæ рацаразын, территори цъæх фæлыстæй саив кæнын. Ныртæккæйы онг кæронмæ фæхæццæ кæнынц бетонæй куыстытæ. Сæвæрдтой уал 1200 кубы. Баззад ма 400 онг кубы сæвæрын. Уымæй дарддæр кæронмæ фæхæццæ кæны канализацион хæтæлты монтаж. Аив кæнынц тезгъогæнæн зонæ: æвæрынц брусчаткæ æмæ æмбæрзынц ног фæндæгтæ æмæ тротуартæ. Рекреацион объекты рацарæзт бацыд йæ тæмæны. Куыстытæм æппынæдзухдæр цæуы бæстон цæстдард Дзæуджыхъæуы администрацийы рдыгæй. Радон æмбырд бынæттон администрацийы сæргълæууæг Милдзыхты Вячеслав скодта арæзтадон объекты. Архайдта ма дзы республикæйы Сæргълæууæджы уынаффæгæнæг Моргуаты Константин. Æмбырды архайджытæ æрныхас кодтой æппæт лыстæг хъуыддæгтыл, цæмæй территори суа аив æмæ дæнцæгæн хæссинаг.
