Уыдонæй иу у профессионалон рухсаразæг техникон кусæнгæрзтæ цæттæгæнæн завод, иннæ та – стоматологон препараттæ цæттæгæнæн куыстуат
Дыууæ цæгатирыстойнаг проекты райстой инновацитæн æмархайды фонды гранттæ 60 милуан сомæн. Уыдонæй иу у профессионалон рухсаразæг техникон кусæнгæрзтæ цæттæгæнæн завод, иннæ та – стоматологон препараттæ цæттæгæнæн куыстуат. Цавæр инновацион бакуыстыты тыххæй сын саккаг кодтой гранттæ, уый тыххæй радзурдзæн Хъайтмазты Дзерассæ.
2018-æм азæй фæстæмæ профессионалон рухсаразæг техникон кусæнгæрзтæ цæттæгæнæн цæгатирыстойнаг завод йæ позицитæ фæфидардæр кодта Уæрæсейы. Раздæр æмбырд кодтой æрмæст рухсдиодон рухсгæнæнтæ. Ныртæккæ куыстуаты ис æххæст цикл. Йæ бæрцуаттæ æдзух фылдæр кæнынц. Санкциты рæстæг завод æрмæст ног уавæртæм гæсгæ кусын нæ сарæхст, фæлæ ма йæ архайд фæтыхджындæр кодта. Куыстуат сси инновацитæн æмархайды фонды конкурсы уæлахиздзау. Цы 30 милуан сомы райстой, уыдонæй куыд спайда кæндзысты, уый ныридæгæн снысан кодтой.
Конкурсы дыккаг уæлахиздзау æмæ грант чи райста, уый у стоматологон хостæ кæм цæттæ кæнынц, ахæм куыстат. Проекты нысан у препаратты ног хуызтæ аразын. «Æнæниздзинад хъахъхъæныны технологитæ æмæ медицинæ»-йы номинацийы бизнес-план нымад æрцыд хуыздæрыл æмæ райста фæрæзтæ. Схардз сæ кæндзысты, пародОнты судзаджы профилактикæйæн æмæ терапияйæн инновацион медикаменттæ цæттæ кæныныл. Препарат конд у гелы хуызы æмæ йын аналогтæ нæй.
Инновацитæн æмархайды фонды конкурсмæ балæвæрдтой 542 проекты. Архайджыты георграфи аххæссыд бæстæйы 60 субъектыл. Грантты фæрæзты иумæйаг бæрц – 2 миллиард сомæй фылдæр. Конкурс дыккаг хатт арæзт æрцыд. 79 уæлахиздзауæй 2 сты цæгатирыстойнаг куыстуæттæ. Цæгат Кавказы федералон зылды æрмæст нæ республикæ райста гранттæ.
Республикæйы инновацитæн æмархайды фонды минæварад кусы 2015-æм азæй фæстæмæ. Уыцы рæстæгмæ баххуыс кодта 100 проектæй фылдæрæн.
