Ацы æмæ æндæр фарстатыл æрныхас кодтой Хицауады уæнгтæ
Президенты хæслæвæрдтæ æххæст кæнын, нацпроекттæ æмæ паддзахадон программæтæ царды уадзын, æхсæнадон территоритæ аив кæнын. Ацы æмæ æндæр фарстатыл æрныхас кодтой Хицауады уæнгтæ. Ныртæккæ фæнд кæнынц бадзырд бафыссын, æппæтадæмон культурон-патриотон центр «Беслæн. 1-æм скъола»-йы экспозицион пълан чи бацæттæ кæндзæн, уыцы специалисттимæ. Культурæйы министрад æхсæнадон организаци «Беслæны мадæлты» активимæ иумæ цæттæ кæны экспозицийыл бакуысты техникон хæслæвæрд. Ныхас цыд, Мæздæджы районы ламидæттæй тæссаг зонæты чи цæры, уыцы адæмы æндæр бынæттæм раивыны мадзæлттæ æххæст кæнынæн фæрæзтæ радих кæныны курдиæттæ Мæскуымæ æрвыст кæй æрцыдысты, ууыл. Дзанайты Барис арæзтады æмæ архитектурæйы министрадæн бабар кодта федералон ведомствæтимæ æнгом æмархайд кæнын. Æмбырды ма дзырдтой, республикæ Запорожьейы облæсты Черниговы районæн баххуыс кæнынмæ йæхимæ цы хæстæ райста, уыдон æххæст кæныныл. Уым 3 скъолайы æмæ сывæллæтты иу рæвдауæндоны фæцис цалцæг. Черниговы районы коммуналон системæ фæззыгон-зымæгон рæстæгмæ цæттæ кæныны нысанимæ бынаты кусы цæгатирыстойнаг бригад.
