Æрæныхас кодтой республикæйы социалон-экономикон рæзты фарстатыл
Хицауады сæрдар Дзанайты Барисæн кусæг фембæлд уыд вице-премьертимæ. Æрæныхас кодтой республикæйы социалон-экономикон рæзты фарстатыл. Бæлвырддæр та стыр æргом аздæхтой, Уæрæсейы Президенты амынддзинæдтæ куыд æххæстгонд цæуынц, уымæ. Республикæйы Сæргълæууæджы амындмæ гæсгæ, Хицауады сæрдары хæдивæг – арæзтады æмæ архитектурæйы министр Атарты Георгийæн баргонд æрцыд Мæздæджы районы ламидæттæй тæссаг кæм у, уыцы районтæм цæст æрдарын. Регион æмгуыстад кæны федералон ведомствотимæ. Вице-премьер Александр Реутов та радзырдта Цæгат Ирыстоны пульмонологон центры рацарæзты тыххæй. Фæззыгон-зымæгон сезонмæ цæттæдзинадыл бæстон доклад скодта хицауады сæрдары хæдивæг Икъаты Русланбег. Хъармгæнæн сезонмæ районты цæттæдзинады паспорттæ кæныны куыст кæронмæ фæхæццæ кæны. Хъæуы, цæмæй цæрæнуæтты-коммуналон системæйы куыст цæуа æнæ къуылымпытæй. Фæлæ кæд фæзыной, уæд та сæ хъæуы æвæстиатæй лыг кæнын. Уæлдай æргом аздахын хъæуы социалон инфраструктурæйы объекттæм, – загъта Дзанайты Барис. Вице-премьер Платы Альбинæйæн та бабар кодтой сидзæр сывæллæттæн цæрæнуæттæ дæттыны фарстамæ бæстондæр æркæсын. Уымæй дарддæр бацæттæ кæнын хъæуы Цæгат Ирыстоны Республикæйæн бындур сæвæрыны 100 азы юбилей сбæрæг кæнынмæ. Уыдзæн 2024-æм азы. Стæй ма фæтагъддæр кæнын хъæуы Беслæны фыццæгæм скъолайы Æппæтадæмон культурон-патриотон центры экспозици саразыны мгъуыд.
