Ныхас цыд бюджетон политикæйы, ахуырады, æнæниздзинадхъахъхъæнынады, цæрæнуæтты-коммуналон комплексы, транспорты инфраструктурæйы фарстатыл
Хицауады сæрдар Дзанайты Барисы разамындæй уыд Хицауады æмбырд. Ныхас цыд бюджетон политикæйы, ахуырады, æнæниздзинадхъахъхъæнынады, цæрæнуæтты-коммуналон комплексы, транспорты инфраструктурæйы фарстатыл. Абайты Васойы номыл стипендийы аккаг 2023-2024-æм ахуыры азты систы Цæгат Ирыстоны гуманитарон æмæ социалон иртæстыты институты хистæр наукон кусæг, филологон наукæты кандидат Дарчиты Мæдинæ, стæй Цæгат Ирыстоны паддзахадон университеты ирон филологийы магистратурæйы 2 курсы студенткæ Гобозты Агуындæ. Наукон архайды æнтыстдзинæдты тыххæй алы мæй исдзысты стипенди 8 мин сомы. Плиты Грисы номыл стипенди та исдзысты ирон филологийы факультеты 5-æм курсы студенткæ Годызты Аринæ, магистратурæйы 1-æм курсы студенткæ Дзебойты Азæ, стæй æппæтадæмон ахастдзинæдты факультеты 3-æм курсы студент Дзарасаты Виктор. Æрвылмæй сын фиддзысты 5-гай мин сомтæ. Ныр нæ республикæйы курдиатджын студенттæ 10 азы дæргъы исынц Плиты Грисы стипенди. Абайты Васойы номыл стипенди та – 5 азы дæргъы. Уый фæсивæды разæнгард кæны наукон архайд кæнынмæ, – загъта премьер. Хаст æрцыд уынаффæ – наукæйы æмæ техникон политикæйы республикон закъонмæ ивддзинæтæ бахæссын. Уымæй дарддæр сфидар кодтой, ацы азы 9 мæймæ республикон закъон куыд æххæстгонд æрцыд, уый. Æфтиæгтæ систы 37 миллиарды æмæ 700 милуан сомæй фылдæр, хæрдзтæ та 37 миллиарды æмæ 300 милуан сомы. Прфоицит у 432 милуан сомы. Бюджет раздæрау арæзт у социалон фарстатæ лыг кæнынмæ. Æмбырды ма стыр æргом аздæхтой транспортон системæйы хæрзхъæддзинадмæ. Ногæй æркæсын хъæуы маршрутон хызы оптимизацимæ. Ныхас ма цыд цардархайды æппæт къабæзтыл æмæ кадрты политикæйыл дæр.
