Фæндаг уыдзæн горæты ныгуылæн фарсы рдыгæй
Дарддæр цæуы Дзæуджыхъæуы иувæрсты цæуæг нырыккон фæндаджы дыккаг æмæ æртыккаг къæпхæнты арæзтад. Фæндаг уыдзæн горæты ныгуылæн фарсы рдыгæй. Райдайдзæн Архонкæйæ – Дзæуджыхъæумæ трассæйæ. Дарддæр цæудзæн Дзæуджыхъæуæй – Алагирмæ, æмæ рацæудзæн Московскийы уынджы сосавæндагмæ. Объект хаст æрцыд паддзахадон программæ «Транспортон системæйы рæзт»-мæ. Регионы разамонæг Сергей Меняйло йæ телеграм-каналы куыд фехъусын кодта, афтæмæй дыууæ фæндаггон сезонмæ конд æрцыд стыр куыст. Фыццаджыдæр – археологон къæхтытæ. Уымæй дарддæр рацарæзтой инженерон коммуникацитæ, æмæ территори бацæттæ кодтой арæзтадон куыстытæн. Иумæйаг нымадæй 8 километры уаццагыл сæвæрдтой асфальты растгæнæг æмæ быннаг цъар. Уымæй дарддæр объекты сæвæрдтой электрон тыхы 830 цæджындзы. Кæронмæ æрхæццæ цæугæдоны сæрты хиды рацарæзт, æмæ эксплуатацийы радтой ног хид. Ныртæккæ объекты куыстытæ цæуынц дарддæр. Проект æххæстгонд цæуы æртæ къæпхæнæй. Куыстытæ фæуынмæ хъавынц ацы азы кæронмæ.
