Хаст æм æрцыдысты 30 нывгæнæджы æмæ 30 скульпторы куыстытæ
«Цаутæ. Хъысмæт. Адæм». Ахæм сæргондимæ равдыст байгом Тугъанты Махарбеджы номыл аивадон музейы. Хаст æм æрцыдысты 30 нывгæнæджы æмæ 30 скульпторы куыстытæ. Равдыст баст у æртæ ахсджиаг цауимæ. Ирдæй дзы фенæн ис ирон аивады алывæрсыгдзинад. Экспозици ахæсдзæн суанг фæззæгмæ.
Республикæйы цæрджытæн ногæй фæзынд фадат, Тугъанты Махарбеджы легендарон уацмыс «Нарты куывд» фенынæн. Раст ын цыма арæнтæ нæй, афтæ кæсы адæймагмæ. Егъау куысты нывгæнæг равдыста канд нарты кадджыты цаутæ нæ, фæлæ нæ рагфыдæлты традицитæ æмæ цардыуаг.
Тугъанты Махарбеджы номыл аивадон музейы байгом равдыст æмæ баст у æртæ ахсджиаг цауимæ. 250 азы Ирыстон Уæрæсеимæ куы баиу, 240 азы Дзæуджыхъæуæн бындур сæвæрыны, æмæ 100 азы республикæйы автономийыл. Уарзон Ирыстоны историон фæндаг равдисын музейы кусджытæн бантыст æххæстæй. Музейы æртæ залы – алы фæлтæрты нывгæнджыты куыстытæ. Алы къабæзты æмæ жанрты конд, фæлæ ахсджиаг цаутыл дзурæг.
Ирдæй бæрæг дарынц советон дуджы куыстытæ дæр. Уыдон дæр сты республикæйы царды ахсджиагдæр рæстæг æвдисæг.
Равдыстадон залты аивадуарзджытæн бацæттæ кодтой 30 нывгæнæджы æмæ 30 скульпторы куыстытæ. Экспозици фенынæн ис дзæвгар рæстæг, равдыст ахæсдзæн октябры онг. Июны экспозици æрбынат кæндзæн музейы дыккаг уæладзыджы. Уым равæрдзысты декоративон æрмдæсныйады æмæ графикæйы куыстытæ.
