Æдæппæтæй ацы аз нысан кæнынц 39 уаццаджы саив кæнын
Алцыдæр æнцон фадæттæн æмæ республикæйы аивдзинадæн. Федералон проект «Горæты æнцонвадат архайд» æххæст кæнгæйæ, Цæгат Ирыстоны нывыл кæнынц æхсæнадон территоритæ. Æдæппæтæй ацы аз нысан кæнынц 39 уаццаджы саив кæнын. Ныртæккæ куыстытæ цæуынц алы фæзты. Не сфæлдыстадон къорд бабæрæг кодта Октябрьскæ. Стæй федта Дзæуджыхъæуы Терчы былгæрæттæ Плиты Иссæйы уынгæй Соляный фæрсуынджы онг куыд аивгонд цæуынц, уый. Бæлвырддæр хабæрттæ радзурдзæн Чехойты Фатимæ.
Октябрьскæйы Тедеты Павелы номыл уынджы ивгъуыд мæйы астæу райдыдтой æхсæнадон территори аивгæнæн куыстытæ. Скалдтой йын йæ зæронд асфальт, райдыдтой бордюртæ æвæрын. Фистæгæйцæуджытæн ног къахвæндæгтæ, бадæн бынæттæ, бырондæттæ æмæ цырагъдарæнтæ – проектмæ гæсгæ территори рацараздзысты нырыккон домæнтæм гæсгæ. Ныридæгæн уал базылдысты фонтанмæ. Ивынц инженерон хызтæ . Æппæт куыстытæ дæр цæуынц федералон проект «Горæт æнцонвадат архайд»-ы фæлгæты.
Ноджыдæр ма иу территори цæуы аивгонд – Дзæуджыхъæуы Терчы былгæроны хай Плиты Иссæйы номыл уынгæй – Соляный фæрсуынджы онг. Ныридæгæн рæвдз сты фистæгæйцæуджытæн хид, дардмæ фæлгæсæн бынат æмæ инвалидтæн – пандус. Хæстæгдæр рæстæг райдайдзысты брусчаткæ æвæрын. Цалцæггонд æрцæудзысты Терк æмæ къахвæндæгтæ хицæнгæнæн ныллæг бырутæ. Базилдзысты цыртдзæвæн «Лæппу æмæ дадамæ» дæр – йæ аивдзинадыл ныридæгæн райдыдтой кусын скульптортæ.
Федералон проект «Горæт æнцонвадат архайд»-ы руаджы ацы аз Цæгат Ирыстоны рацараздзысты 39 æхсæнадон бынаты. Уыдон равзæрстой республикæйы цæрджытæ æппæтуæрæсеон мадзал – хъæлæсдæттыны руаджы. Проект царды æххæстгонд цæуын райдыдта 2019-æм азы. Уæдæй нырмæ аивгонд æрцыдысты 182 æхсæнадон территорийы.
Ацы аз цæрджытæ рацаразынхъуаг территоритæ æвзæрстой хъæлæсгæныны руаджы. Республикæйы цæрæнуæтты-коммуналон хæдзарады, артаджы æмæ энергетикæйы министры хæдивæг Надгериты Батраз куыд фехъусын кодта, уымæ гæсгæ 2025 азы аивгонд æрцæудзысты 35 æхсæнадон территорийы.
