Æртыккаг бон йæ фæзуаты Сергей Меняйло фембæлд Узбекистаны республикйы делегацийымæ, йæ сæргъы æххæстбарджын минæвар Ботиржон Асадов
Грознайы кæронмæ æрхæццæ Кавказы инвестицион форум. Æртыккаг бон йæ фæзуаты Сергей Меняйло фембæлд Узбекистаны республикйы делегацийымæ, йæ сæргъы æххæстбарджын минæвар Ботиржон Асадов. Ныхас цыд æмгуыстады фарстатыл. Сергей Меняйло куыд фæбæрæг кодта, афтæмæй фæстаг азты Уæрæсейы æмæ Узбекистаны ахастдзинæдтæ кæнынц æнгомдæр æмæ фидардæр, се мгуыстады авналæнтæ та кæнынц фылдæрæй фылдæр. Нæ республикæйы цæры узбекаг диаспорæ, йæ уæнгтæ та стыр æвæрæн хæссынц Ирыстоны этнокультурон тыгъдадмæ. Дыууæ бæстæйы минæвæрттæ дзырдтой æмгуыстады фарстатыл экономикæ, базарад, ахуырад æмæ культурæйы. Уæ зæрдыл уын æрлæууын кæндзыстæм, фарон нæ республикæйы бизнес æхснæнады минæвæрттæ кусæг балцы ацыдысты Узбекистанмæ æмæ федтой йæ базарады авналæнтæ. Нæ республикæ уырдæм экспорты арвитдзæн хæдзары дзаума, адджын дæттæ æмæ минералон хъацæнтæ. Дыууæ регионы баныхас кодтой сæ ахастдзинæдты арæнтæ фæуæрæхдæр кæныныл.
Сергей Меняйлойæн ма форумы фæзуаты кусæг фембæлд уыдис Беларусы республикæйы æххæстбарджын минæвар Александр Рогожниккимæ дæр. Ныхас цыдис дыууæ бæстæйы хсæн базарадон ахастдзинæдтыл. Цæгат Ирыстон Беларусы республикæмæ рвиты алыхуызон аппаратурæ, æфсæйнагæй конд хæдзары дзаума, электрон машинæтæ æмæ сæ ивæн хæйттæ. Нæ республикæ та уырдыгæй исы хæдзары дзаума, рухсгæнæн ифтонггарз, мыд æмæ сой. Фембæлды кæрон Сергей Меняйло куыд фæбæрæг кодта, афтæмæй дыууæ республикæйы хсæн ис æнгом ахастдзинæдтæ, æмæ уыдон фидар кæныныл дарддæр кусдзæн Цæгат Ирыстон.
