Фæлæ уавæр аивыныл куыст цæуы, фехъусын кодта æрвылкъуырион аппаратон æмбырды цæрæнуæтты-коммуналон хæдзарады министр Таматы Майрæн
Ростовы атомон электростанцæйы ивгъуыд къуыри цы аипдзинæдтæ рцыд, уый аххосæй Цæгат Ирыстоны электрон тых лæвæрд цыди æмæ цæуы къуылымпытимæ. Фæлæ уавæр аивыныл куыст цæуы, фехъусын кодта æрвылкъуырион аппаратон æмбырды цæрæнуæтты-коммуналон хæдзарады министр Таматы Майрæн. Сергей Меняйло бабар кодта республикæйы цæрджыты æнæрлæугæ донæй ифтонг кæнын, кæд æмæ сæрдыгон сезон у, уæддæр. Ома адæм сæрдыгон донæй фылдæр пайда кæнынц, цæхæрадæттæ донæй кæй пырх кæнынц, уымæ гæсгæ. Ныхас ма цыд хъармгæнæн сезонмæ цæттæгæнæн куыстыл дæр. Нæ республикæйы ныридæгæн уыцы хæстæ сæххæст кодтой 47%. Бæлвырддæр та куыстытæ цæуынц 2-æм арæндоны хъармгæнæны, стæй психоневрологон хæдзар-интернат «Милосердие»-йы. Фæлхасадмæ цæстдарды управленийы бæрæггæнæнтæм гæсгæ республикæйы эпидемиологон уавæр у æмбæлгæ уагыл. Карз хæцгæнизтæй рынчын кæнынц, сезонмæ гæсгæ. Уыимæ арæзт цæуынц эпидемийы ныхмæ æппæт æмбæлгæ мадзæлттæ. Ахуырады министр Алыбекты Эллæ куыд фехъусын кодта, афтæмæй Цæгат Ирыстоны самал кодтой скъолаты ног автобустæ. Æдæппæтæй нысан кæнынц 11 автобусы райсын. Нырма уал райстой 4. Уыдон ратдзысты Горæтгæрон æмæ Рахизфарсы районтæн. Электрон тых дæттыны фарстамæ здæхгæйæ, Сергей Меняйло бабар кодта æппæт хъуыддæгтыл лæмбынæг æрлæууын, цæмæй æмбæрстгонд уа, республикæ электрон тых цас æмæ куыд исы, уый. Уымæ гæсгæ æмбæрстгонд уыдзæн, кæм ис фæстауæрц кæнын, цæмæй цæрæнуæтты сектор электрон тыхæй цух ма æййафа, уый тыххæй.
