Ирыстойнаг спортсментæ дзы сæхи равдыстой иттæг хорз
Новосибирскы 16-æмæй 21-æм июльмæ арæзт æрцыд Уæрæсейы чемпионат уæззау атлетикæйæ. Ирыстойнаг спортсментæ дзы сæхи равдыстой иттæг хорз. Гусалты Зæринæ æмæ Наниты Тимур систы уæлахиздзаутæ. Наниты Арсен та у ерысты æвзист призер, æмæ ма сæххæст кодта æппæадæмон къласы спорты мастеры норматив. Чехойты Фатимæ фембæлд уæлахиздзаутимæ, æмæ йын бакæсæм йæ сюжетмæ.
Хъаруджын æмæ сæрæн. Наниты Тимуры тренировкæтæм алы бон дæр цымыдисæй кæсынц Ногиры спорткомплексы уæззау атлетикæйы секцийы хъомылгæнинæгтæ. Йæ арæхстдзинад дисы фтауы лæппуты. Се *хсæн тренировкæ фæкæны Европæйы чемпион, Дунейы Кубокы æвзист майдан рамбулæг. Новосибирскы уый радон хатт сси Уæрæсейы чемпион. 109 килограмы уæзы йæ бæрæггæнæн уыд 417 килограммы.
Тимурæн йæ тренер у йæ фыд Наниты Руслан – Советон Цæдисы рекордсмен. 9 аздзыдæй цæуы Тимур залмæ. Раздæр ын цымыдисаг уыд, спортсментæ помостмæ куыд рацæуынц, уымæ кæсын, хъуыста-иу, йæ фыд сын цытæ фæдзæхсы, уыдонмæ. Ацы спорты хуыз йæ зæрдæмæ афтæ тынг фæцыд, æмæ йæхи дæр бафæндыд штангæ сисын. Афтæ йæ уæззау атлетикæ систа спорты бæрзæндтæм.
Ацы чемпионаты уæлахиздзау сси Гусалты Зæринæ дæр. 71 килограмы уæзы йæ бæрæггæнæн уыд 238 килограммы. Тренер Золойты Хъазыбеджы разамындæй чызгæн йе спортивон æнтыстдзинæдты къæбиц дзагæй дзагдæр кæны сызгъæрин майдæнтæй. Уый та у хорз цæттæдзинад æвдисæг.
Зæринайы тых, техникæ æмæ уæнгты айст æхсызгондзинад хæссынц йæ фарсхæцджытæн. Спорты йæхицæн дæнцæгæн нымайы дунейы чемпионкæ, 2012 азы Лондоны Олимпаг хъæзтыты æвзист майдан рамбулæг Цæрукъаты Светланæйы. Нæ республикæйы чысыл нæй зындгонд штангисттæ. Уæззау атлетикæйы цæгатирыстойнаг скъола бæстæйы лæууы хуыздæрты æмрæнхъ. Зæринæ бирæ рæстæг æрвиты, фыццаг хатт кæм æрлæууыд, уыцы залы. Афтæмæй йæхи цæттæ кæны фидæны ерысты ног рекордтæ æвæрынмæ.
Ацы ерысты Гусалты Зæринæ сси Уæрæсейы дыууæ хатты чемпионкæ, Наниты Тимур та фондз хатты чемпион. Наниты Арсен рамбылдта æвзист майдан. Уымæй уæлдай ма уый ссæххæст кодта æппæтадæмон спорты Мастеры норматив дæр. Цæгатирыстойнаг спортсментæ уæндон къахдзæфтæй цæуынц, сабитæй цы фæндаг равзæрстой, ууыл. Æххуыс сын сты – сæ хъару æмæ ныфс. Афтæмæй сæ къухты æнæмæнг бафтдзæн сæ нысан – Олимпаг майдантæ рамбулын.
