Уæвгæ, æфсæнвæндаджы раз фæз рагæй уыди базилинаг
Федералон программæ «Горæты æнцонвадат архайд» æххæст кæнгæйæ, Адæмон фронты активисттæ федтой, Дзæуджыхъæуы цалдæр объекты аивгæнæн куыстытæ куыд цæуынц, уый. Уæвгæ, æфсæнвæндаджы раз фæз рагæй уыди базилинаг. Куыстытæ конд æрцыдысты хæрзхъæд æмæ проектон-сметон документацимæ гæсгæ. Сæ иумæйаг аргъ у 498 мин сомы. Объекты баивтой тротуарон къæйдуры хай æмæ бордюртæ. Фæлæ ма дзы баззад пырх асфальтимæ уаццæгтæ. Баивинаг сты саст бандæттæ, зæронд урнæтæ, тæссаг пандустæ æмæ рухсгæнæнтæ. Хъыгагæн, уыцы хъуыддæгтæ рагагъоммæ фыст не рцыдысты. Æхсæнадон кусджыты хъуыдымæ гæсгæ, уый аххосæй фæзы аивгæнæн куыстытæ æххæстæй нæ зынынц. Иннæ объект та ис Владикавказскийы æмæ Хъесаты Астаны уынгты тигъыл. Æхсæнадон зонæйы цалцæгыл схардз кодтой 5 милуан сомы онг. Ам сæвæрдтой ног бандæттæ, фæлæ цыбыр рæстæг фæлаггад кодтой. Хъæдын конструкцитæ хорз кæй нæ бафидар кодтой, уый аххосæй. Адæмон фронты активисттæ уый фæдыл курдиат арвыстой горæты администрацимæ.
