Уый тыххæй аппаратон æмбырды фехъусын кодта Цæгат Ирыстоны ахуырады æмæ наукæйы министр Алыбекты Эллæ
Республикæйы ахуырады æмæ наукæйы министрад ног ахуыры азмæ балхæдта 365 мин чиныджы. Уый нымайгæйæ, скъоладзаутæм ахуыргæнæн фæрæзтæ уыдзæнис фаг — уый тыххæй аппаратон æмбырды фехъусын кодта Цæгат Ирыстоны ахуырады æмæ наукæйы министр Алыбекты Эллæ. Йæ фиппаинагмæ гæсгæ, ныртæккæ республикæйы нæ фаг кæны математикæйы æмæ физикæйы ахуыргæнджытæ, фæлæ ног ахуыры азмæ уыцы фарста лыггонд æрцæудзæн. Сергей Меняйло бахаста фæндон, цæмæй куыстыл æфтауой хистæр курсыты студентты.
Аппаратон æмбырды ма республикæйы Сæргълæууæг æрдзон æвæрæнты министрадæн бабар кодта карьерты архайдмæ мониторингы куыст саразын. Ныхас ма цыд цæугæдæтты былгæрæттæ фидаргæнæн куыстыл. Стыр æргом аздæхтой цæрæнуæтты-коммуналон хæдзарады къабазы фарстатæм. Сергей Меняйло профилон ведомствотæн радта хæс – разамынддæттæг компаниты ахадындзинадмæ æркæсын. Æнхъæлмæкæсæн бынæттæ кæй байдзаг сты, уый нымайгæйæ, Сергей Меняйло бафыста уагæвæрд, цæмæй республикæмæ рæстæгмæ мауал уадзой уæзласæн транспорт. Ахæм уынаффæ рахастой оперативон штабы æмбырды бæрæггæнæнтæм гæсгæ, цæмæй республикæйы фæндæгтыл транспорт ма мбырд кæна, уый тыххæй. Ныртæккæ Уæллаг Ларсы цæстдарæн пункт кусы штатон фæткмæ гæсгæ, фæлæ Гуырдзыйы рдыгæй æппæт рæнхъытæ нæ кусынц.
