Ныр студенттæ пайда кæндзысты фидæны патрулон-посты службæйы, слестгæнджыты æххуысгæнджытæ æмæ фæндæгтыл æдасдзинады цæуыны инспекцийы пъæлицæйæгтæн ахуырæн хъæугæ æрмæгæй. Ахуыргæнинæгты фыццаг фæлтæрæн колледж йæ дуæрттæ байгом кодта ивгъуыд аз. Ног техникон фæрæзты тыххæй бæстондæр радзурдзæн Чехойты Фатимæ.
Пъæлицæйы криминалон кусæджы хъæугæ æрмæгæй пайдагæнгæйæ, фыдракæнд кæм æрцыд, уым сæмбырдгæнæн ис зылынгæнæн дзауматæ, фæстæдæр та раттын экспретон хатдзæг æвдисæндартимæ. Цæгат Ирыстоны паддзахадон базарадон-экономикон колледжы 2-æм курсы студенты йæ сабибонтæй фæндыди юрист суæвын. Ныр ам зонгæ кæны криминалон къабазимæ. Ахуыр кæны фыццаг медицинон æххуыс кæныныл, архайы хæцæнгарзимæ. Ахуыргæнæндоны ис нырыккон лазерон тир. Уым студенттæн амонынц хæцæнгарзæй æхсыны техникæ.
Ахуыргæнæндон фарон проект «Профессиналитет»-ы фæлгæты райста грант. Уый руаджы ам фæзынд ног дæсныйад. Æлхæд æрцыдысты ахуырæн хъæугæ нырыккон техникон фæрæзтæ. Ныр студенттæ пайда кæнынц «Чемодан криминалиста» кæй фæхонынц, уымæй, лазерон æхсæн тренажерæй, гæххæттыты æцæгдзинад бæрæггæнæг аппаратæй. Манекенты руаджы та ахуыр кæнынц фыццаг медицинон æххуыс кæныныл. Лаборатори ифтонг у фотороботы программæйæ.
Ам студенттæ саразынц фыдракæнд саразæджы ныв. Куыст у зын, домы уæлдай цæстдард. Æртыккæгæм курсы студенткæ Цæрикъаты Маленæ ныридæгæн хорз арæхсы фоторобот аразыныл. Йæ ныхæстæм гæсгæ, бахъуыд тынг бирæ рæстæг, цæмæй йын адæймаджы ныхæстæм хъусгæйæ рауайа фыдгæнæджы ныв скæнын. Маленæ барадхъахъхъæнæджы дæсныйад равзæрста йæ хистæртæм гæсгæ. Чызг колледжы фæстæ фæнд кæны ацы дæсныйадыл уæлдæр ахуырад райсыныл.
Проект «Профессионалитет»-ыл Цæгат Ирыстоны паддзахадон базарадон-экономикон колледжы кусын райдыдтой 2023 азы. Мидхъуыддæгты министрады кусджытæ студенттæн æдзухдæр кодтой дæсныйадæвдисæг ахуыртæ æмæ семинартæ. Зонгæ сæ кодтой криминалистикæйы сусæгдзинæдтимæ. Ног ахуыры азæй та ма сын райдайдзысты лекцитæ кæсын дæр.
Проект «Профессионалитет» астæуккаг ахуырадмæ бахаста бирæ ногдзинæдтæ. Азæй азмæ фылдæр абитуриенттæ сæ гæххæттытæ бадæттынц колледжтæм æмæ техникумтæм. Равзарынц нырыккон царды хъæугæ дæсныйæдтæ.
