Уæлдай тынг адæймаджы æнæниздзинадыл фæахады куы фæкалы, уæд – июлы райдианæй сентябры кæронмæ
Амбрози у æппæтæй зианхæссæгдæр хæмпæлгæрдæгтæй иу. Йæ рыг у тыхджын аллерген. Уæлдай тынг адæймаджы æнæниздзинадыл фæахады куы фæкалы, уæд – июлы райдианæй сентябры кæронмæ. Специалисттæ куыд зæгъынц, афтæмæй аллергийæ кæй тыхсын кæны, уыцы адæм кæнынц фылдæр. Йемæ куыд тох кæнынц, уый тыххæй радзурдзæн Хъайтмазты Дзерассæ.
Индира Усманова 2 къуырийы размæ æрбаздæхт республикæмæ æмæ уайтагъд банкъардта æнæхцон симптомтæ – æхснырсæг, дудын, рæсыд. Аллергияйы æууæлтимæ чызг бацыд дохтырмæ.
Статистикæмæ гæсгæ, аллергийæйæ рынчынты нымæц алы 10 азы дæр 2 хатты фæфылдæр вæййы. Азæй-азмæ рæзы, амброзийы, бæлæсты, зæгъæм, бæрзы, фæрвы, æхсæрбыны рыгмæ аллергия кæмæ ис, уыдоны нымæц. Дохтыртæ куыд зæгъынц, афтæмæй раздæр ахæм пациенттæ къаддæр уыдысты.
Республикæйы дарддæр тох кæнынц амброзиимæ. Зайæгой фæкалы июлæй-сентябрьмæ. Уыцы рæстæг æвзæры бирæ аллергеннон рыг. Уыимæ аллергенимæ сæмбæлынæн, амбрози æнæмæнг хъуамæ хæстæг ран ма рæза, – рыджы муртæ дардмæ æнцонæй парахат кæнынц.
Доны станцæ у горæты цæрджыты сæйрагдæр фæлладуадзæн бынæттæй иу. Станцæйы кусджытæ куыд зæгъынц, афтæмæй амбрози калын куы райдыдта, уæл фæлладуадзджыты нымæц нæ фæкъаддæр.
Æхсæнадон территоритæ, социалон объектты раз фæзтæ – уыцы зонæтыл дзуапп дæтты горæты администраци. Бирæфатерон хæдзæртты кæртыты зианхæссæг кæрдæг хъуамæ кæрдой разамынддæттæг компаниты минæвæрттæ, хи хæдзæртты раз территоритæм та адæм хъуамæ кæсой сæхæдæг. Фæлæ афтæ алы хатт нæ вæййы.
Ирыстойнаг префектурæйы куыд радзырдтой, афтæмæй амброзиимæ тох, куыд æндæр хæмпæлгæрдæгтимæ дæр, ахадгæйæ цæуы. Амбрози кæм рæзы, уыцы бынæттæ сбæлвырдгæнгæйæ, адæмæн сæ бон у телефонæй бадзурын префектурæмæ, кæнæ та ныффыссын телеграм-каналы.
Фæззæджы аллергия фæлæмæгъдæр вæййы, хæмпæлгæрдæгтиæ тох та, уæлдайдæр зианхæссæг рыг чи парахат кæны, уыдонимæ тох цæудзæн дарддæр.
