Скæнынц сын ахуыртæ физкультурæйæ, æрбахонынц сæм республикæйы артистты, саразынц сын сфæлдыстадон изæртæ
Национ программæ «Демографи»-йы федералон проект «Хистæр фæлтæр» æххæстгæнгæйæ Ацæргæ адæм æмæ инвалидты республикон боныгон центры арæзт цæуынц культурон мадзæлттæ. Скæнынц сын ахуыртæ физкультурæйæ, æрбахонынц сæм республикæйы артистты, саразынц сын сфæлдыстадон изæртæ. Иу ахæм бæрæгбонæн æвдисæн уыди не сфæлдыстадон къорд дæр.
Ацæргæ адæмы æмæ инвалидты боныгон уæвыны республикон центры алы райсом дæр райдайы зарядкæйæ. Скандинавон цыд у адæмæн сæ уарзондæр. Уый руаджы фæхуыздæр вæййы дадзинты туджы цыд, хорзырдæм фæбæрæг вæййы уæхсджытыл, фæфидар вæййынц нуæрттæ. Ахæм цыды фæстæ астæуы хъæд уæз йæхиуыл къаддæр фенкъары. Йæ фæрцы адæм фылдæр рæстæг вæййынц сыгъдæг уæлдæфы. Гаглойты –Гаджиты Венерæ фыццаг аз нæ цæуы ардæм. Бафиппайдта, йе *нæниздзинад кæй фæфидардæр, уый.
Цæстдарын æрмæст буары æнæниздзинадмæ нæ хъæуы. Хъуыдыйаг у уды ахаст дæр. Республикæйы хæдзар-интернаты «Узæлд»-ы ацæргæ адæм æмæ инвалидтимæ æдзухдæр фæкусы психолог. Къуыри иу хатт сын саразы ахуыртæ – Арт-терапия æмæ нейробикæйæ. Психолог Кокойты Теяйы ныхæстæм гæсгæ, ахæм ахуырты фæстæ адæм фæныфсджындæр вæййынц, кæрæдзиимæ фæхуыздæр вæййынц сæ ахастытæ.
«Узæлд»-ы сæрмагонд бынат ис сфæлдыстадон куыстæн. Евгений Александров ам 15 азы цæры. Интернаты рабæрæг йæ поэтикон курдиат. Ам цæргæйæ ныффыста 400 æмдзæвгæйы. Мыхуыргонд цæуынц газеттæ æмæ журналты. Евгений у цалдæр æмбырдгонды автор. Тагъд рухс фендзысты йæ ног куыстытæ.
Федералон проект «Хистæр фæлтæр»-ы национ программæ «Демографи» æххæстгæнгæйæ «Узæлд»-ы арæзт æрцæуынц алыхуызон сфæлдыстадон мадзæлттæ. Интернаты кусджытæ æрбахонынц республикæйы артистты. Хæдзары ис йæхи сфæлдыстадон къорд дæр. Алы бæрæгбоны дæр уый архайджытæ бахъæлдзæг кæнынц адæмы зæрдæтæ.
Активон цард æмæ сфæлдыстадон куыст кæнын йæ бон у алы адæймагæн дæр, цал фæнды азы йыл куы цæуа, уæддæр. Хор «Зарæггæнаг зæрдæтæ» Ирыстойнаг районы социалон æххуысы комплексон центры кæны æнтыстджын куыст 7 азы дæргъы. Йæ архайджыты курдиат циндзинад хæссы музыкæйæн аргъгæнджытæн. Сфæлдыстадон къорд архайдта нæ республикæйы æмæ сыхаг регионты культурон мадзæлтты.
Ацæргæ адæмы центртæ ис нæ республикæйы алы районы дæр æмæ Дзæуджыхъæуы. Хистæртæ æмæ инвалидтæй кæй фæнда, уыдонæн сæ бон у ахæм хæдзæртты ссарын зæрдæмæ хæстæг æмæ цымыдисаг куыст. Ацы аз национ проект «Демографи»-йы федералон проект «Хистæр фæлтæр»-ы архайджытæ суыдзысты 5 минæй фылдæр цæрæджы. Сæйраг нысан – саразын æппæт уавæртæ хистæр адæмы цард фæрогдæр кæнынæн.
