Бæрæгбоны программæ райдыдта республикæйы экскурсоводтæн семинарæй
Туризмы æппæтдунеон бон сбæрæг кодтой Дзæуджыхъæуы. Бæрæгбоны программæ райдыдта республикæйы экскурсоводтæн семинарæй. Мадзал арæзт æрцыд национ наукон библиотекæйы. Фембæлды архайджытæн раарфæ кодта Цæгат Ирыстоны туризмы комитеты сæрдары хæстæ рæстæгмæ æххæстгæнæг Кочиты Сослан. Куыд загъта, афтæмæй 2019-æм азæй туризм ахадгæйæ рæзы. Фарон республикæ бабæрæг кодтой милуан æмæ 500 мин адæймаджы онг. Ацы аз æнхъæлмæ кæсынц фылдæрмæ. Стыр куыст цæуы туризмы райрæзтыл – гом кæнынц ног къабæзтæ, арæзт цæуы инфраструктурæ. Уыимæ ахсджиаг у, регионы хицæндзинæдтæ хынцын, сыгъдæг бынæтты æмæ кувæндæтты уæвгæйæ, бæлвырд æгъдæуттæ æххæст кæнын. Ацы фарстайы бирæ аразгæ у æнæмæнг гидтæй æмæ экскурсоводтæй, уымæн æмæ уыдон комкоммæ кусынц туристон къордтимæ, загъта Кочиты Сослан.
