Объекттæм базылдысты национ проект «Ахуырад»-мæ гæсгæ
Адæмон фронты минæвæрттæ сбæлвырд кодтой, бындурон цалцæг цы скъолаты спортивон залты скодтой, уыдоны хæрзхъæддзинад. Объекттæм базылдысты национ проект «Ахуырад»-мæ гæсгæ. Эксперттæ бабæрæг кодтой 7 спортивон залы Мæздæджы, Алагиры, Горæтгæрон æмæ Рахизфарсы районты.
Ахæм лыстæг хъуыддæгтæ нæ тыхсын кæнынц, зæгъы Дачныйы скъолайы директор Аза Албакова. 1976-æм азæй спортивон залы бындурон цалцæг иу хатт дæр нæ уыд. Ахуыргæнджытæ йæм сæхи хъарутæй зылдысты. Хъæдын пъолтæ арæх хъуыдис ивын, урочыты рæстæг та-иу сывæллæттæ рыг систой. Ныр ам ис зæрдæмæдзæугæ уавæртæ. Уый федтой адæмон фронты минæвæрттæ мониторингы рæстæг. Скъолайы ис спортивон клуб. Гæнæн ис футболæй, волейболæй, баскетболæй архайын, кусы боксы секци дæр.
Зынгæ фылдæр фиппаинæгтæ ис Черменыхъæуы 3-æм скъолайы спортивон залы. Ам дæр бындурон цалцæг фæцис ахуыры азы райдианмæ. Фæлæ мониторингы рæстæг рабæрæг сты къуылымпыдзинæдтæ. Къултыл нæй хъахъхъæнæн протектортæ, пъолыл нысантæ нæй, рудзгуытыл та – хъахъхъæнæн хызтæ. Æмæ æрмæст уый нæ.
Фиппаинæгтæ нæ уыд Иван Канидийы номыл скъола-интернаты. Ацы ахуыргæнæндон Беслæны арæзт æрцыд æрæджы – 2010-æм азы. Фæлæ спортивон залмæ хъуыд чысыл базилын. Директор Константин Каниди куыд загъта, афтæмæй куыстытæ иттæг хорз æххæстгонд æрцыдысты.
Бындурон цалцæг спортивон залты æххæстгонд æрцыд нацпроект «Ахуырад»-мæ гæсгæ. Æдæппæтæй ацы аз базылдысты 7 спортзалмæ Мæздæджы, Алагиры, Горæтгæрон æмæ Рахизфарсы районты. Æппæт объекттæ сцæттæ кодтой ацы ахуыры азы райдианмæ.
Ацы фарстатæ æрвыст æрцæудзысты ахуырады æмæ наукæйы министрадмæ æмæ бындурон арæзтады управленимæ, загътой адæмон фронты минæвæрттæ, цæмæй æппæт фиппаинæгтæ иуварсгонд æрцæуой.
