3 боны йæ архайджытæн арæзт цæуынц лекцитæ, дисскуситæ, дæсныйадæвдисæг ахуыртæ
«Кавказаг акцент». Дзæуджыхъæуы цæуы креативон индустрийæты фыццаг Цæгаткавказаг форум. 3 боны йæ архайджытæн арæзт цæуынц лекцитæ, дисскуситæ, дæсныйадæвдисæг ахуыртæ. Мадзал арæзт æрцыд культурон хъæппæристы президентон фонды æххуысæй. Бæлвырдæдр хабæрттæ радзурдзæн Хъайтмазты Дзерассæ.
Нæдæр къæвда, нæдæр уазал дымгæ нæ бахъыгдæрдтой ацы перфоманс сæххæст кæнын. Æцæг ирон дзыккайы 200 килограммы сцæттæ кодтой республикæйы цæрджытæн æмæ уазджытæн. Ацы хъуыддаг сæххæст кæнынæн центрон парчы сæмбырд сты хуыздæр хистæр хæринаггæнджытæ.
3 бонмæ Дзæуджыхъæу сси, регионалон æмæ федералон æмвæзады креативон бизнесы къабæзтæ кæм баиу сты, ахæм фæз. Цалынмæ иутæ национ хæринæгтæй аходæн кодтой, уæдмæ иннæтæ зонгæ кодтой аивадимæ. Зæгъæм, кавказаг кæлмæрзæнты фæрцы. Иу равдысты æрæмбырд кодтой Цæгат Кавказы дизайнерты куыстытæ. Ацы кæлмæрзæнтæй алкæцыйæн дæр ис йæхи рæсугъддзинад, фæлæ сæ иу кæны кавказаг акцент. Арт-проект «Красота в квадрате» у креативы тыххæй. Фæлæ уый нæ нысан кæны, рагон национ кæлмæрзæнтæ рохуаты кæй баззадысты, уый. Уыдон дæр хаст æрцæудзысты экспозицимæ.
Лекцитæ, дискусситæ, дæсныйадæвдисæг ахуыртæ. Форумы программæ стыр у. Йæ аразджытæ акцент скодтæй модæйыл, кинойыл, æрмдæсныйæдтыл, музыкæйыл æмæ гастронОмийыл. Форум сæмбырд кодта 40 экспертæй фылдæр, пленарон æмбырды та архайдта республикæйы сæргълæууæг Сергей Меняйло.
Специалисттæ куыд зæгъынц, афтæмæй креативон индустрийæты райрæзт гæнæн ис æрмæст стыр нысантæм тырнæг бизнесменты æмæ хицаудзинады иумæйаг куысты фæрцы. Æмæ афтæ хъуамæ уа алы регионы дæр.
Уымæ гæсгæ æппæтæй сæйрагдæр хæс у – æххуыс кæныны процессмæ иумæйагæй бавналын. Æрмæст уæд уыдзæн фидарæй зæгъæн, Цæгат Кавказы креативон индустрийæтæ рæзынц, куыд хъæуы, афтæ.
