Хуынд æм æрцыдысты фæкæсынхъуаг æмæ бирæсывæллонджын бинонты сабитæ, сидзæр сывæллæтты хæдзæрты хъомылгæнинæгтæ, стæй сæрмагонд æфссæддон операцийы архайджыты кæстæртæ
Уæрæсейы сгуыхт артист Александр Олешко хæрзаудæн концерт радта Тæбæхсæуты Балойы номыл Ирон академион театры. Хуынд æм æрцыдысты фæкæсынхъуаг æмæ бирæсывæллонджын бинонты сабитæ, сидзæр сывæллæтты хæдзæрты хъомылгæнинæгтæ, стæй сæрмагонд æфссæддон операцийы архайджыты кæстæртæ. Зындгонд артист чысыл театрдзаутæн бацæттæ кодта аргъау «Кот в сапогах». Музыкалон коллективæн тар разамынд лæвæрдта Махъоты Ацæмæз. Концерт саразыныл бакуыста культурон хъæппæристы Президентон фонд. Фидараты Маринæ радзурдзæн бæстондæр.
Симфони æмæ аргъау баиу сты Тæбæхсæуты Балойы номыл Ирон академион театры сценæйы. Афтæмæй стыр лæвар ракодтой сабитæн. Уæрæсейы сгуыхт артист Александр Олешко Ирыстонмæ сласта йæхи проект – зындгонд аргъау «Кот в сапогах». Фæлæ хуымæтæг спектакль нæ уыд. Александр Олешкойы аив дзырд баххæст кодтой змисыл нывтæ. Уæдæ музыкæйы зæлты руаджы та сси æцæг алæмæты мадзал. Махъоты Ацæмæзы разамындæй симфонион оркестр фæндаг ссардта алкæйы зæрдæмæ дæр.
Ацы гастрольтæ Александр Олешко сбаста бинонты азимæ. Музыкалон аргъау ныридæгæн равдыста нæ бæстæйы алы регионты. Æмæ алы ран дæр циндзинад хæссы чысыл театрдзаутæн. Хæрзаудæн концерттæ арæзт цæуынц бынæттон оркестртимæ, культурон хъæппæристы президентон фонды æххуысæй.
Ирон театры æрæмбырд бирæ адæм. Се ппæт дæр баззадысты разыйæ. Сæ хъуыдытæ æмæ æнкъарæнтæ дзырдтой куыд сабитæ, афтæ сæ ныййарджытæ дæр.
Александр Олешко Ирыстоны фыццаг хатт нæй. Æмæ алы хатт йе рбацыд республикæйы театрдзаутæн вæййы стыр лæвары хуызæн. Зындгонд артист йæхæдæг куыд зæгъы, афтæмæй кæддæриддæр фенкъары нæ адæмы хъарм ахаст æмæ зæрдиаг арфæтæ.
