Проект у национ программæйы хай æмæ йæ нысан у 2030-æм азмæ Уæрæсейы экономикæйы ног къабаз саразын
Цæгат Кавказы аграрон технологон колледжы байгом æнæ пилотæй чи тæхы, ахæм системæты центр. Проект у национ программæйы хай æмæ йæ нысан у 2030-æм азмæ Уæрæсейы экономикæйы ног къабаз саразын. Йæ фæрцы нæ бæстæйы алы къабæзты араздзысты æмæ пайда кæндзысты æнæ пилотæй тæхæн граждайнаг аппараттæй. Дронты руаджы абон æххæстгонд цæуынц бирæ ахсджиаг нысантæ. Пайда сæ кæнынц промышленносты, хъæууон хæдзарады, арæзтады æмæ афтæ дарддæр. Чехойты Фатимæйæн ныхасы бар.
Æрæджы дæр ма ацы бынаты арæзт цыдысты алыхуызон сфæлдыстадон мадзæлттæ, ныр та у фидæны фæз. Уымæн æвдисæн дронтæ. Республикæйы æнтыстджынæй цæуы куыст ног технологиты къабазы. Æнæпилотон аппарат уæлдæфмæ суадзын у хъуыддагæн йе*мбис. Раздæр уал дрон хъæуы сæмбырд кæнын.
Цæгат Кавказы аграрон – технологон колледжы ахуыргæнинæнгтæ сæ нысантæ иттæг хорз æххæст кæнынц. Ацы дæсныйад сын ног нæу. Ахуыргæнæндоны йыл кусынц 3-аг аз. Æнæпилотон авиацион системæты Центр дæр колледжы хуымæтæджы нæ байгом кодтой. Ам ахуыр кæндзысты æнæпилотон тæхæг аппаратты æппæт хуызтимæ кусыныл. Ифтонг у нырыккон техникон фæрæзтæй, уыдоны *хсæн – алы уавæрты хъæугæ тренажертæ-симулятортæ дæр. Центр байгом Уæрæсейы Рухстауынады министрады гранты æххуыссæй. Æхцайы фæрæзтæ лæвæрд кæмæн æрцыд, уыцы 30 регионы *хсæн бахауд Цæгат Ирыстон дæр. Нырыккон техникон фæрæзтæй æмæ хъæугæ методикон æрмæгæй пайда кæндзысты æрмæст колледжы студæнттæ нæ, фæлæ ма æндæр ахуыргæнæндæтты минæвæрттæ дæр.
Ныридæгæн республикæйы скъолаты гом æрцыд, æнæпилотон авиацион системæты хицæндзинæдтæ кæм ахуыр кæндзысты, ахæм кълæстæ – 18. Ног Центр баиу кæндзæн, ацы ахсджиаг дæсныйадимæ хæстæгдæр базонгæ уæвын кæй фæнды, уыдоны.
Медиаконтентыл куыст, хъæууон хæдзарад, æфсад… Æнæпилотон тæхæг аппараттæй адæм кæм спайда кæндзысты, ахæм къабæзтæ бирæ. Ныр та зынгæ фæфылдæр уыдзæн, арæхстджынæй семæ чи архайдзæн, ахæм специалистты нымæц дæр.
