Раздæр йæ цардархайд фылдæр баст уыд спортимæ, ныр та йе ргом аздæхта сфæлдыстадмæ – уый йæ зæрдæйы алкæддæр сæрмагонд бынат ахста
Дзæуджыхъæуы цæрæг Хъороты Мæдинæ цæттæ кæны авторон куклатæ миниатюрæйы. Раздæр йæ цардархайд фылдæр баст уыд спортимæ, ныр та йе ргом аздæхта сфæлдыстадмæ – уый йæ зæрдæйы алкæддæр сæрмагонд бынат ахста. Чызджы коллекцийы ис Абайты Васойы, Хетæгкаты Къостайы, Марина Цветаевайы куклатæ. Хуымæтæг æлыгæй аив фæлгонц куыд рауайы, уый тыххæй радзурдзæн Хъайтмазты Дзерассæ.
Хетæгкаты Къоста, Марина Цветаева, Николай Гоголь… Зындгонд адæм та ракастысты дунемæ, фæлæ ныр ног хуызы. Авторон куклатæ кæнын Хъороты Мæдинæйæн ног хъуыддаг у. Раздæр йæ царды фылдæр архайдта спортæй. Фæлæ сфæлдыстад кæддæриддæр хицæн бынат ахста йæ зæрдæйы.
Куклатæ кæныны процесс æнцон нæу. Ахсджиаг у æрмæст техникон æгъдæуттæ æххæст кæнын нæ, фæлæ сæ цард бауадзын, уд сын балæвар кæнын. Хъороты Мæдинæйы хæрзконд фæлгонцтæ æххæстгонд сты символикон предметтæй. Уыдон дæр йæхæдæг скæны.
Историйæ ист сурæттæ кæнын æрхъуыдыгондтæй зындæр у – бæрнондæр. Фæлæ уæддæр ахæм лæмбынæг куыст чызджы нæ тæрсын кæны.
Кæй сурæт фæцæттæ кæны, уыдонæй алкæй истори дæр Мæдинæ йæ зæрдæмæ арф айсы.
Ныртæккæ Хъороты Мæдинæйы коллекцийы ис 15 куысты. Алкæцыдæр сæ зæрдæйæ конд у. Æмæ, æвæццæгæн, уымæн йæ куклатæ афтæ тынг цæуынц адæмы зæрдæмæ.
