Цы рецепттыл бакуыстой, уыдон хаст æрцæудзысты студентты квалификацион куыстытæм
Ирон бæгæныйы æрвылазон конкурс-фестиваль арæзт æрцыд Цæгат Кавказы хæххон металлургон институты. Мадзал баст уыд Джеоргуыбайы бæрæгбонимæ. Цы рецепттыл бакуыстой, уыдон хаст æрцæудзысты студентты квалификацион куыстытæм. Жюрийы хыгъды сты республикæйы бæгæныфыцæн куыстуæтты специалисттæ. Фестивалы архайджытæн æмæ дегустатортæн сæ бон уыд алы рецепттæ æмæ технологитæ абарын, сæ фæлтæрддзинадимæ базонгæ кæнын.
Цæгат Кавказы хæххон-металлургон институты студенткæ Цæболты Алинæ бæгæны фыцыны сусæгдзинæдтæ хорз зоны. Йæ командæ «Барсы»-имæ нозты рецептурæйыл бакуыста «Ирон бæгæны»-йы конкурс-фестивальмæ. Мадзал арæзт æрцыд хæххон-металлургон институты. Алинæ йæ хæлæрттимæ йæ нозты рецептыл куыста 2 къуырийы дæргъы. Хуымæллæг, дон, зад æмæ сæкæр – хуымæтæг хъацæнтæ, фæлæ ахсджиаг у, цæттæ кæныны технологи раст сæххæст кæнын. Студенттæ пайда кодтой сæ бинонты рецепттæй.
«Ирон бæгæны»-йы æрвылазон конкурс-фестиваль уыд «æнхъизæн кондадты технологийы» факультеты. Мадзал сбастой Джеоргуыбайы бæрæгбонимæ. Конкурсы архайдтой техникон факультетты 1-æм-2-æм курсыты студенттæ – æдæппæтæй 24 командæйы. Студенттæ пайда кодтой æрмæст хæрзхъæд продукцийæ. Алкæмæндæр йæ бон уыд нозтæй ацаходын æмæ хи уæлахиздзауы равзарын.
Конкурсы жюрийы хыгъдмæ бацыдысты республикон бæгæныфыцæн куыстуæтты специалисттæ. Нозтæн аргъ кодтой алы бæрæггæнæнтæм гæсгæ. Эксперттæ се ргом здæхтой адмæ, хуызмæ æмæ хæрздæфмæ. Жюрийы уæнг Дыдарты Георгий куыд загъта, афтæмæй конкурс фæсивæдæн хорз фадат дæтты практикæйы сæ зонындзинæдтæ бафæлварынæн æмæ куыстдæтджыты раз сæ арæхстдзинад равдисынæн.
Цæгат Кавказы хæххон-металлургон институты уыд æцæг бæрæгбон. Студенттæ архайдтой сæ продукт куыд гæнæн ис, афтæ хуыздæр спрезентаци кæныныл. Конкурсы уæлахиздзаутæн саккаг кодтой æхцайы сертификаттæ, стæй призтæ.
