Уый тыххæй хицауады æмбырды фехъусын кодта профилон министр Таматы Майрæн. Йæ фиппаинагмæ гæсгæ, æппæт 9 хъармдæттæг организацийы æмæ 8 муниципалитеты райстой цæттæдзинады паспорттæ. Хъармгæнæн сезон цæуы фидаргонд фæткмæ гæсгæ. Ныхас цыди, туризмы комитет куыд æхгæд цæуы, ууыл дæр. Хицауады сæрдар Дзанайты Барис куыд загъта, афтæмæй комитеты кусджытæ рацæудзысты экономикæйы райрæзты министрадмæ. Æппæт специалисттæн дæр уыдзæнис куысты бынæттæ.
Хъæууон хæдзарады министрады бæрæггæнæнтæм гæсгæ, ацы аз республикæйы аграритæ райстой паддзахадон æххуыс 800 милуан сомы онг. Афæдзы кæронмæ фæрæзты бæрц суыдзæнис иу миллиард сомы. Республикæйы рæзы сæнæфсир æмæ сæн аразыны къабаз. Уыцы нысантæн фермертæн радтой субсиди 105 милуан сомы. Иу ахсджиаг фарста ма баст уыд æнæниздзинадхъахъхъæнынады къабазы рацарæзты регионалон программæимæ. Профилон министр Тебиаты Сослан куыд радзырдта, афтæмæй нысан кæнынц 47 медицинон техникæйы æмæ кусæнгарзы самал кæнын.
