Кусын райдыдта ацы аз сентябры
«Ирон саби». Афтæ схуыдта йæ телеграм-канал Гæздæнты Агуындæ. Равæры дзы сывæллæттæн ахуырадон видеоæрмæджытæ ирон æвзагыл. Кусын райдыдта ацы аз сентябры. Ныридæгæн ыл сæхи бафыстой мин адæймагæй фылдæр. Ацы хъуыды англисаг æвзаджы ахуыргæнæгмæ куыд æрцыд, уый тыххæй радзурдзæн Хъайтмазты Дзерассæ.
Радон видео-урок Гæздæнты Агуындæйæ. Ног, цымыдисаг хъæзтытимæ. Ахæм хуызы сабитæн мадæлон æвзагимæ зонгæ кæнын зынгæ æнцондæр у. Йæ сывæллæтты иронау дзурыныл ахуыр кæнын чызг æндæр хуызы дæр фæлвæрдта – семæ ныхас кодта æрмæст ирон æвзагыл. Хорз гæнæн у, фæлæ фаг нæ разынд.
Афтæмæй фæзындысты алыхуызон хъæзтытæ. Агуындæ алы бон дæр хъуыды кодта цыдæр ног хъазт, фæлæ сæйраг домæн нæ ивта – хъазын æрмæст ирон æвзагыл дзургæйæ.
Фыццаг Агуындæ ахуыр кодта æрмæст йæхи æмæ йæ хæстæджыты сабиты, уый фæстæ ацы хъуыддагмæ се ргом раздæхтой сыхæгтæ. Афтæмæй райгуырдис фæнд телеграм-канал скæнын. Цæмæй йæ сывæллæтты мадæлон æвзагыл дзурын ахуыр кæнын кæй фæнды, уыдонæн уа, цымыдисаг æмæ пайдайаг контентæй пайда кæныны фадат.
Агуындæ у англисаг æвзаджы ахуыргæнæг, ирон æвзагыл профессионалон æгъдауæй никæй ахуыр кодта, уымæ гæсгæ социалон хызты сæрмагонд канал кæнынмæ йæ ныфс нæ хаста.
Ныртæккæ Гæздæнты Агуындæйы телеграм-каналыл сæхи бафыстой мин адæймагæй фылдæр. Æмæ уыцы нымæц бонæй-бонмæ рæзы.
