Республикæйы æмæ Æрæфы районы ветеранты советы хъæппæрисæй дзы арæзт æрцыд «Лæгдзинады урок»
Йæ цард бафæзминаг, йæ хъæбатæрдзинæдтæ – дæнцæгæн æрхæссинаг. Цыколайы фыццæгæм скъолайы æрымысыдысты Фыдыбæстæйы Стыр хæсты ветеран Гулуты Хизиры рухс ном. Республикæйы æмæ Æрæфы районы ветеранты советы хъæппæрисæй дзы арæзт æрцыд «Лæгдзинады урок». Уыд дзы не сфæлдыстадон кеъорд дæр. Ныхасы бар Сосранты Жаннæйæн.
Гулуты Хизиры фырт Оледжы арфæтæн кæрон нæй, æгайт ма кæстæртæм хаст цæуынц нæ кадджын, фæзминаг хистæрты нæмттæ. Радон мадзал арæзт æрцыд Цыколайы 1-æм скъолайы. «Лæгдзинады урок» баст уыд Фыдыбæстæйы Стыр хæсты ветеран Гулуты Хизиры номимæ. Кадджын фронтовик уыд Æрæфы районæй рацæуæг. Йæхæдæг дæр ахуыр кодта ацы скъолайы.
Хизир уыд Дзæуджыхъæуы, Курскы, Крымскы, Мæздæджы, Малгобекы æмæ йæ райгуырæн Цыколайы кадджын гражданин. Ацы бон ын йæ царды фæндаджы хабæрттæ хъахъхъæнынц цæсты гагуыйау, æмæ сæ хæццæ кæнынц дзыллæтæм. Ацы хатт къамтæ исæг Владимир Иванов æппæт адæмы дæр базонгæ кодта йæ хуызистыты альбом «Гулуты Хизир. Уæлахиздзау»-имæ.
Мадзалы архайдтой Гулуты Хизиры бинонтæ, районы разамынды, ветеранты советы минæвæрттæ. Дзæуджыхъæуы ветеранты Советы сæрдар Гецаты Валерий скъолайы чиныгдонæн балæвар кодта зонадон æрмæгæй æххæст чингуытæ.Гулуты Хизир архайдта Кавказы тохы, уæгъд кодта Краснодар, Хъырым æмæ Украинæ. Йе фсæддон æнтыстдзинæдты тыххæй хорзæхгонд æрцыд Сырх Стъалыйы, стæй Фыдыбæстæйы хæсты 1-æм æмæ 2-æм къæпхæны ордентæй. 2019-æм азы йын лæвæрд æрцыд «Ирыстоны Намысы» орден. Разамынд лæвæрдта Дзæуджыхъæуы Рахизфарсы районы ветеранты Советæн. Кадджын ветеран йæ цардæй ахицæн 2021-æм азы. Мадзал саразджыты хъуыдымæ гæсгæ «Лæгдзинады уроктæ» арæзт цæудзысты иннæ районты дæр.
